भक्तपुरमा ट्याक्सी चालकलाई धारिलो हतियार देखाएर नगद तथा मोबाइल लुटपाट गर्ने चार जनालाई प्रहरीले पक्राउ गरेको छ।

पक्राउ पर्नेमा सूर्यविनायक नगरपालिका–७, गुण्डु बस्ने दोलखा घर भएका १९ वर्षीय सौरभ मगर र २० वर्षीय अस्मित गजमेर, रामेछाप घर भएका १९ वर्षीय नविन राउत तथा काठमाडौं कीर्तिपुर नगरपालिका–६, चारघरे बस्ने ३० वर्षीय निलकुमार बस्नेत रहेका छन्।

सूर्यविनायक नगरपालिका–४, अनन्तलिङ्गेश्वरस्थित खड्का गाउँमा बा.२ ज ८६४२ नम्बरको ट्याक्सी चालकलाई मंगलबार धारिलो हतियार देखाएर नगद र मोबाइल लुटेर फरार रहेका उनीहरूलाई जिल्ला प्रहरी परिसर भक्तपुरबाट खटिएको टोलीले पक्राउ गरेको हो।

पक्राउ परेका उनीहरूमाथि डाँका चोरी मुद्दामा जिल्ला अदालत भक्तपुरबाट ५ दिनको म्याद थप अनुमति लिई प्रहरीले आवश्यक अनुसन्धान गरिरहेको छ।