चीनले नयाँ म्याग्लेभ (Maglev) ट्रेन निर्माण गरेको छ, जुन पाङ्ग्रा नभएको र चुम्बकीय बलको प्रयोगमा आधारित अत्याधुनिक रेल हो । यो ट्रेन "चल्दैन" भन्ने भनाइ प्रचलित भए पनि, वास्तवमा हावामा तैरिएर तीव्र गतिमा यात्रा गर्ने विश्वकै सबैभन्दा छिटो रेल बन्ने अपेक्षा गरिएको छ ।

चुम्बकीय प्राविधिमा आधारित यस ट्रेनको अधिकतम गति प्रतिघण्टा ६०० किलोमिटरसम्म पुग्नेछ। यसले बेइजिङदेखि सांघाईसम्मको १,२०० किलोमिटरको दूरी झन्डै २.५ घण्टामा पूरा गर्न सक्नेछ, जुन अहिलेको बुलेट ट्रेनले करिब ५.५ घण्टा लिन्छ।

चीनको १७औँ आधुनिक रेलवे प्रदर्शनीमा सार्वजनिक गरिएको यस ट्रेनलाई चाइना रेलवे रोलिङ स्टक कर्पोरेशन (CRRC) ले निर्माण गरेको हो। यसमा कुनै पाङ्ग्रा छैन, र चुम्बकीय शक्ति प्रयोग गरेर ट्र्याकमाथि उचालिएर यात्रा गर्छ। घर्षण नगन्य हुने भएकाले यसले अत्यन्त उच्च गतिको यात्रा सम्भव बनाउँछ।

म्याग्लेभ अर्थात् "म्याग्नेटिक लेभिटेसन" ट्रेनहरू ट्र्याकमा सिधै चल्दैनन्, बरु चुम्बकीय बलको सहयोगमा केही मिलिमिटर माथि तैरिन्छन्। यसले गर्दा आवाज अत्यन्त कम हुन्छ, घर्षण नहुने भएकाले मर्मतसम्भार पनि न्यून हुन्छ। सीआरआरसीका वरिष्ठ इन्जिनियर शाओ नानका अनुसार, यसमा सुपरकन्डक्टिङ म्याग्नेटिक टेक्नोलोजी प्रयोग गरिएको छ, जसले रेल हल्लिनबाट जोगाउँछ र यात्रालाई सहज बनाउँछ।

नयाँ म्याग्लेभ ट्रेन पूर्ण रूपमा अटोमेटिक हुनेछ। यसमा ५जी सञ्चार प्रणाली, एआई-आधारित भिडियो क्याप्चर प्रणाली र अत्याधुनिक सेन्सरहरू जडान गरिनेछन्। यसले यात्राको सुरक्षा र प्रभावकारिता दुवैमा सुधार ल्याउने विश्वास लिइएको छ।

यस परियोजनाको पहिलो चरणको तयारी पूरा भइसकेको छ, अब व्यावसायिक सञ्चालन अघि परीक्षण चरण बाँकी छ। "द पेपर" समाचार संस्थाका अनुसार, यो ट्रेन चीनको विद्यमान रेलवे नेटवर्कबाहेक प्रमुख शहरहरूलाई पनि आपसमा जोड्नेछ।

शाओ नानका अनुसार, यो ट्रेनले हवाईजहाज र हालको हाई स्पीड ट्रेन बीचको दूरीलाई घटाउनेछ, विशेष गरी २,००० किलोमिटरसम्मको दुरीका लागि उपयुक्त हुनेछ।

चीनले पहिलो म्याग्लेभ रेल सेवा सन् २००३ मा जर्मनीको सहयोगमा सुरू गरेको थियो, जसले सांघाईको पुडोङ विमानस्थललाई शहरसँग जोड्छ। सन् २०१६ मा चाङ्शामा पहिलो घरेलु म्याग्लेभ लाइन सुरु गरियो भने २०१७ मा बेइजिङमा पनि सेवा विस्तार गरियो। यद्यपि ती म्याग्लेभहरूको गति हाल १२० किमी प्रतिघण्टामा सीमित छ।

चीनले सन् २०२४ मा १,००० किमी प्रतिघण्टा गति क्षमता भएको म्याग्लेभ हाइपरलूप प्रोजेक्टको परीक्षण पनि गरिसकेको छ, जसमा कम-दबावयुक्त भ्याकुम ट्युब र चुम्बकीय प्रोपल्सन प्रणाली प्रयोग गरिन्छ। यद्यपि, हाइपरलूप प्रविधि अझै प्रयोगात्मक चरणमै छ।