बडादसैँ नजिकिएसँगै काठमाडौँको नयाँ बसपार्कबाट घरगाउँ फर्किने यात्रुको चाप अत्यधिक बढेको छ। 

रोजगारी, अध्ययन तथा विभिन्न पेसा-व्यवसायका लागि राजधानीमा रहेका मानिसहरू दसैँ मनाउन धमाधम गाउँ फर्किन थालेसँगै नयाँ बसपार्कमा लामो तथा छोटो दूरीका सवारीसाधनमा यात्रुको बाक्लो चहलपहल देखिएको छ। नयाँ बसपार्क सञ्चालन गरिरहेको लोत्से बहुउद्देश्यीय प्रालिका अनुसार असोज १७ देखि २५ गतेसम्मको ९ दिनको अवधिमा नयाँ बसपार्कबाट मात्रै २ लाख ७ हजार २५१ जना यात्रु बाहिरिएका छन्।

यात्रुको चाप बढे पनि सडकको दुरावस्थाका कारण यातायात व्यवस्थापनमा समस्या उत्पन्न भएको नेपाल यातायात व्यवसायी राष्ट्रिय महासङ्घले जनाएको छ। असोज २३ गते अग्रिम टिकट बुकिङ खुला भएकै दिन धादिङको गलौँदीस्थित पृथ्वी राजमार्ग भासिँदा सवारीसाधन आवागमन अवरुद्ध भएपछि धेरै बसहरू काठमाडौँमै रोकिन पुगेका थिए। महासङ्घका महासचिव डेकनाथ गौतमले यात्रुहरूलाई अनिवार्य रूपमा टिकट काटेर, तोकिएको भाडा मात्र तिरेर र सवारीको अवस्था जाँच गरी सुरक्षित यात्रा गर्न आग्रह गरेका छन्। हरेक वर्ष दसैँमा परिवार र आफन्तसँग खुसी साट्न गाउँ फर्किनेहरूको लर्कोका कारण काठमाडौँ उपत्यका सुनसान बन्दै गएको छ।