सुनसरीको देवानगञ्ज गाउँपालिका-४, कप्तानगञ्ज मेहता टोलबाट प्रहरीले मङ्गलवार राति करिब ५१ किलोग्राम अवैध लागूऔषध गाँजा बरामद गरेको छ।

नेपालबाट भारततर्फ जाँदै गरेको BR 50 AH 1913 नम्बरको भारतीय मोटरसाइकललाई नियन्त्रणमा लिई तलासी गर्दा उक्त परिमाणको गाँजा फेला परेको हो। इलाका प्रहरी कार्यालय देवानगञ्जबाट खटिएको प्रहरी टोलीलाई देख्नासाथ मोटरसाइकल चालक भने सवारीसाधन छाडेर फरार भएका थिए।

फरार चालकको खोजी तीव्र पारिनुका साथै घटनाका सम्बन्धमा आवश्यक अनुसन्धान भइरहेको प्रहरीले जनाएको छ।