नेपाली कम्युनिस्ट पार्टीका संयोजक पुष्पकमल दाहाल 'प्रचण्ड'ले लामो सङ्घर्ष र बलिदानबाट प्राप्त राजनीतिक उपलब्धिलाई निमिट्यान्न पार्ने षड्यन्त्र भइरहेको बताएका छन्।

शहीद सुरेश वाग्ले ‘वासु’ र भीमसेन पोखरेल ‘वैरागी’ को २७औँ स्मृति सभालाई सम्बोधन गर्दै संयोजक प्रचण्डले प्रतिक्रियावादी शक्तिहरूबाट गणतन्त्रविरोधी चलखेल जारी रहेको बताए। उनले शहीदहरूको सपनालाई आत्मसात् गर्दै प्राप्त परिवर्तनको रक्षाका लागि नयाँ सङ्कल्प र ऊर्जाका साथ दृढतापूर्वक उभिनुपर्नेमा जोड दिएका थिए ।

प्रचण्डले भने, “प्रतिक्रियावादी शक्तिहरूले आन्दोलन र बलिदानबाट प्राप्त उपलब्धिलाई निमिट्यान्न पार्ने प्रयास गरिरहेका छन्। यस्तो बेला शहीदहरूको सपना र योगदानलाई आत्मसात् गर्दै नयाँ सङ्कल्प र ऊर्जाका साथ अघि बढ्नु आवश्यक छ।”

सो अवसरमा उनले २०५६ सालमा गोरखामा सहादत प्राप्त गरेका शहीद वाग्ले र पोखरेलको बलिदानले तत्कालीन राज्यसत्ताविरुद्धको आन्दोलनलाई नयाँ उचाइमा पुर्‍याउन ऐतिहासिक भूमिका खेलेको स्मरण गरे। उनीहरूको त्याग नेपाली क्रान्तिकारी आन्दोलनमा सधैँ प्रेरणाको स्रोत रहने उनको भनाइ थियो।