काठमाडौं, ११ भदौ – नेकपा (एकीकृत समाजवादी) को पदाधिकारी चयनमा गुटगत प्रतिस्पर्धा चरम विन्दुमा पुगेको छ । नयाँ बानेश्वरस्थित एक ब्याङ्क्वेटमा भइरहेको मतदानमा अध्यक्ष माधवकुमार नेपाल पक्षले बाँडेको ‘चिट’ ले पार्टीभित्र तरंग ल्याएको छ । सार्वजनिक भएको चिटमा महिला उपाध्यक्षमा रामकुमारी झाँक्री, मधेशी उपाध्यक्षमा रामचन्द्र झा लगायतका नेताहरुको नाम समावेश छ । 

यद्यपि, झाँक्री र झाको प्रतिस्पर्धामा क्रमशः जयन्ती राई र धर्मेन्द्रप्रसाद साह रहेका छन् । खुला उपाध्यक्षमा गंगालाल तुलाधर, जगनाथ खतिवडा, उर्वादत्त पन्त र विरोध खतिवडाको नाम समावेश भए पनि माधव नेपाल पक्षको चिटमा डा.विजयकुमार पौडेल, प्रकाश ज्वाला लगायतका नेताहरुको नाम छैन ।

चार उपमहासचिवमा रामकुमार भट्टराई, राजेन्द्रकुमार राई, नागेन्द्र चौधरी र अम्मर थापाको नाम माधव नेपाल पक्षले आफ्नो गुटमा राखेको छ भने ७ सचिवमा हस्तबहादुर शाही, दिलकुमारी पन्त, शेरबहादुर कुँवर, धर्मनाथ पौडेल, श्रीनाथ बराल, टोकबहादुर वाइवा र कृष्ण नेपालीको नाम उल्लेख छ । अध्यक्ष नेपाल पक्षले बाँडेको यो चिटले पार्टीभित्रको गुटगत राजनीतिलाई उजागर गरेको छ । यसले पार्टी एकतामा चुनौती थपिएको विश्लेषण गरिएको छ ।
विपक्षी पक्षको प्रतिक्रिया

अध्यक्ष नेपाल पक्षले बाँडेको चिटको विषयमा पार्टीभित्रको विपक्षी पक्षले कडा प्रतिक्रिया दिएको छ । उनीहरूले यसलाई पार्टी विधानको उल्लङ्घन भएको र व्यक्तिगत स्वार्थमा आधारित भएको आरोप लगाएका छन् । पार्टीका एक नेताले भने, “यो चिटले पार्टीभित्रको लोकतान्त्रिक अभ्यासलाई कमजोर पारेको छ । यसले पार्टीलाई विभाजनको नजिक पुर्‍याएको छ।” अर्का नेताले भने, “अध्यक्षको यो कदमले पार्टीमा असन्तुष्टि बढाएको छ । यसले पार्टीको भविष्यमाथि नै प्रश्नचिन्ह खडा गरेको छ।”

माधव नेपाल पक्षले वितरण गरेको चिट तल दिइएको छ ।