नेकपा एमालेको सचिवालय बैठक आज अपराह्न ४ बजे पार्टी केन्द्रीय कार्यालय च्यासल, ललितपुरमा बस्ने भएको छ । बैठकका तयारीबारे एमाले प्रचार विभाग प्रमुख राजेन्द्र गौतमले जानकारी दिएका छन् ।

बैठकमा पुस तेस्रो साता सम्पन्न केन्द्रीय कमिटी बैठकका निर्णयहरूलाई अन्तिम रूप दिने र त्यसअनुसार अन्तरपार्टी निर्देशन (अपानी) जारी गर्ने योजना रहेको छ । बैठकले पार्टीलाई थप संगठित र सुदृढ बनाउने कार्ययोजनामा केन्द्रित रहने बताइएको छ ।

वामदेव गौतमको जिम्मेवारीबारे छलफल
बैठकले एमालेमा प्रवेश गर्न लागेका नेता वामदेव गौतमलाई दिने जिम्मेवारीका विषयमा पनि छलफल गर्ने तय गरिएको छ । पार्टीभित्र वामदेवको भूमिकाबारे विभिन्न तहमा चासो रहँदै आएको छ । 

सचिवालयले यो विषयमा ठोस निर्णय गर्न सक्ने सम्भावना छ । गत पुस तेस्रो साता सम्पन्न एमालेको केन्द्रीय कमिटी बैठकले संगठनात्मक विकास र राजनीतिक रणनीतिका विभिन्न विषयमा महत्वपूर्ण निर्णय गरेको थियो । ती निर्णयहरूको कार्यान्वयन र आगामी कार्ययोजना तय गर्न आजको बैठकलाई अर्थपूर्ण मानिएको छ ।