गणेशमान सिंहको २७औँ स्मृति दिवस मनाइयो, प्रजातन्त्रका लागि उनको योगदानको स्मरण
नेपाली कांग्रेसका संस्थापक नेता गणेशमान सिंहको २७औँ स्मृति दिवस बुधबार शोभाभगवतीमा उनको शालिकमा माल्यार्पण गर्दै मनाइएको छ। कार्यक्रममा उपप्रधान एवं सहरी विकासमन्त्री प्रकाशमान सिंहले स्वर्गीय सिंहको नेपालको प्रजातान्त्रिक आन्दोलनमा महत्त्वपूर्ण योगदानको चर्चा गरे।
उपप्रधानमन्त्री सिंहले गणेशमान सिंहले १५ वर्षभन्दा बढी समय जेल जीवन बिताएको र कहिल्यै कुनै सम्झौता नगरेको स्मरण गराउँदै उनको प्रजातन्त्रको स्थापनाका लागि गरेको बलिदानको प्रशंसा गरे। साथै, ०४६ सालको जनआन्दोलनपछि सिंहलाई प्रधानमन्त्री बन्न प्रस्ताव गरिएको भए पनि उनले त्यो अस्वीकार गरेको उल्लेख गरे।
गणेशमान सिंह १९७२ साल कात्तिक २४ गते काठमाडौँको चाक्सीबारीमा जन्मिएका थिए र १९९७ सालदेखि प्रजा परिषद्को सदस्यका रूपमा राणा शासनको अन्त्यका लागि सक्रिय थिए। २०५४ साल असोज २ गते उनको निधन भएको थियो।
तपाईको प्रतिक्रिया दिनुहोस