नेपाली कांग्रेस सम्बद्ध युवा तथा विद्यार्थी संगठनले नियमित महाधिवेशनको मागसहित शुक्रबार काठमाण्डौंमा भेला आयोजना गरेका छन्।

उक्त भेलामा पार्टीका विभिन्न तहका नेताहरूले नियमित महाधिवेशनलाई संस्थागत गर्न आवश्यक रहेकोमा जोड दिएका थिए । विद्यार्थी नेता मनिषजङ्ग थापाका अनुसार भेलाले संगठनलाई सुदृढ बनाउन महाधिवेशन अनिवार्य भएको धारणा व्यक्त गरेको छ ।

कार्यक्रममा नेविसंघका केन्द्रीय सदस्य आदर्श मल्लले पार्टीभित्रको भागबण्डा संस्कृति र नेतृत्वको कमजोरीका कारण विद्यार्थी संघलगायत भातृसंस्थाहरू कमजोर बन्दै गएको बताए। उनले संगठनलाई एकताबद्ध गर्दै निर्वाचनमा सहभागी हुने वातावरण तयार पार्नु सबैको जिम्मेवारी भएको उल्लेख गरेका छन् ।

त्यसैगरी कांग्रेसका युवा नेता पुष्पकुमार शाहीले व्यक्तिगत स्वार्थभन्दा माथि उठेर जेनजी युवाको भावना सम्बोधन गर्न पार्टीले नियमित महाधिवेशनमा जानु अपरिहार्य रहेको बताए। “पार्टीमा विशेष वा नियमित महाधिवेशनको विवाद आवश्यक छैन। वडादेखि केन्द्रसम्म जेनजी युवाको प्रतिनिधित्व सुनिश्चित गर्न नियमित महाधिवेशन आवश्यक छ,” शाहीले भने।

अधिकांश वक्ताहरूले देशको वर्तमान अवस्थामा कांग्रेसले फागुन २१ गते निर्धारित प्रतिनिधिसभा निर्वाचनमा ध्यान केन्द्रित गर्नुपर्ने र त्यसका लागि संगठनले नियमित महाधिवेशनमार्फत आन्तरिक संरचना मजबुत बनाउनुपर्ने धारणा राखेका थिए।

भेलामा नेपाली कांग्रेसका महिला केन्द्रीय सदस्य, तरुण दलका प्रतिनिधि तथा युवा–विद्यार्थी संगठनका केन्द्रीय सदस्यहरूको सहभागिता रहेको थियो।