राष्ट्रिय स्वतन्त्र पार्टी (रास्वपा) र विवेकशील साझा पार्टीबीच औपचारिक रूपमा एकीकरण भएको छ। ‘सुसंस्कृत राजनीति’ र ‘सुशासन’ लाई केन्द्रमा राख्दै दुवै वैकल्पिक राजनीतिक शक्तिहरूले आइतबार ५ बुँदे सहमतिपत्रमा हस्ताक्षर गर्दै पार्टी एकताको घोषणा गरेका हुन्।

सहमतिपत्रका अनुसार सबै नेपालीको समतामूलक उन्नति, सामाजिक न्यायसहित उदार अर्थतन्त्र र बहुलवादी लोकतान्त्रिक प्रणालीभित्र असल शासन कायम गर्ने लक्ष्यसहित एकता गरिएको उल्लेख छ। रवि लामिछाने नेतृत्वको रास्वपाले छोटो समयमै निर्माण गरेको संसदीय हैसियत र स्व. उज्वल थापाद्वारा सुरु गरिएको ‘विवेकशील अभियान’ को दीर्घ योगदानलाई आधार मानेर यो एकीकरण गरिएको प्रष्ट पारिएको छ।

सहमति अनुसार एकीकरणपछि दलको नाम ‘राष्ट्रिय स्वतन्त्र पार्टी’ नै रहनेछ भने चुनाव चिह्न ‘घण्टी’ कायम रहनेछ। पार्टीको झण्डा पनि जस्ताको तस्तै रहनेछ ।

विवेकशील साझा पार्टीले रास्वपाको राजनीतिक सिद्धान्त र नेतृत्वलाई निःशर्त स्वीकार गरेको छ। सोहीसँगै, रास्वपाले स्व. उज्वल थापा र ‘विवेकशील अभियान’ ले वैकल्पिक राजनीतिको प्रवर्द्धनमा पुर्‍याएको योगदानलाई आफ्नो आधिकारिक दस्तावेजमा समेट्दै संस्थागत मान्यता दिने निर्णय गरेको छ।

संगठनात्मक समायोजनका लागि रास्वपाको आगामी राष्ट्रिय महाधिवेशनसम्म ‘संघीय नेतृत्व मञ्च’ नामक विशेष संयन्त्र गठन गरिनेछ। साथै, प्रदेश र स्थानीय तहका संरचनामा योग्यता, समावेशिता र सार्वजनिक छविको आधारमा दुवै पार्टीका नेता-कार्यकर्ताको उचित समायोजन गरिने उल्लेख छ।

एकीकरण प्रक्रियालाई कानुनी रूपमा टुंग्याउन निर्वाचन आयोगका आवश्यक प्रक्रिया पूरा गर्ने तथा दुवै पार्टीको नाममा रहेका चल–अचल सम्पत्तिको व्यवस्थापन आपसी समझदारीका साथ शीघ्र सम्पन्न गर्ने निर्णय पनि सहमतिपत्रमा समेटिएको छ।

दुवै दलले लोकतान्त्रिक सुशासन र समुन्नतिका पक्षमा उभिने अन्य सुसंस्कृत तथा परिवर्तनकामी शक्ति, समूह र व्यक्तिहरूलाई ‘घण्टी’ चुनाव चिन्हमा समाहित हुन आह्वान गरेका छन्।

सहमति पत्रमा रास्वपातर्फबाट कार्यवाहक सभापति डोल प्रसाद अर्याल र उपसभापति तथा उच्च संवाद समितिका संयोजक डा. स्वर्णिम वाग्लेले हस्ताक्षर गरेका छन् भने विवेकशील साझातर्फबाट अध्यक्ष समीक्षा बाँस्कोटा र उपाध्यक्ष तथा राजनीतिक संवाद समितिका संयोजक प्रकाशचन्द्र परियारले हस्ताक्षर गरेका छन्।