प्रगतिशील लोकतान्त्रिक पार्टी (प्रलोपा) का संरक्षक जनार्दन शर्माले डेढ देखि दुई महिनाभित्र पार्टीको राष्ट्रिय सम्मेलन गर्ने घोषणा गरेका छन्। उनले आगामी निर्वाचनको अवस्था र मितिलाई ध्यानमा राखेर सम्मेलनको तालिका तय गरिने बताएका छन्।

आज काठमाडौँमा आयोजित प्रलोपाको एक भेलालाई सम्बोधन गर्दै शर्माले पार्टीको विचार र सिद्धान्तलाई जनताले प्रस्ट बुझ्ने भाषामा सार्वजनिक गर्नुपर्ने आवश्यकता औँल्याएका छन् ।

शर्माका अनुसार, राष्ट्रिय सम्मेलनको समयसीमा निर्वाचनको मितिमा निर्भर रहनेछ । फागुनमै निर्वाचन भयो भने वैशाखमा सम्मेलन गर्न बताएका छन् । संरक्षक शर्माले पार्टीको आन्तरिक संरचनामा आमूल परिवर्तन गरी विकेन्द्रीकरण गरिने योजना सार्वजनिक गरेका छन् । उनले पार्टीका सबै समितिहरूलाई पूर्ण स्वायत्तता दिइने बताए ।

'हामीले पार्टीका सबै समितिलाई स्वायत्तता दिनेछौँ। अब नेताको वरिपरि घुमेर होइन, जनताको मत ल्याएर यहाँ बहस गर्नुपर्छ। केन्द्रले प्रदेशलाई, प्रदेशले पालिकालाई हस्तक्षेप गर्ने होइन,' शर्माले भने।