नेकपा एमालेको ११औँ राष्ट्रिय महाधिवेशनअन्तर्गत आजबाट काठमाडौँको भृकुटीमण्डपमा बन्दसत्र सुरु हुँदैछ। नयाँ नेतृत्व चयनका लागि बिहान साढे ७ बजेदेखि बन्दसत्र सञ्चालन गरिएको पार्टीले जनाएको छ।

महाधिवेशनमा देशभरबाट २ हजार २ सय ६२ जना प्रतिनिधि सहभागी छन्। महाधिवेशनले अध्यक्ष, एक महासचिव, तीन उपाध्यक्ष, तीन उपमहासचिव र सात सचिवसहित २ सय ५१ सदस्यीय केन्द्रीय कमिटी चयन गर्ने कार्यतालिका तय गरिएको छ।

महाधिवेशनका क्रममा सबै पदाधिकारी समेटिएको अध्यक्षमण्डल गठन गरिएको छ। साथै, महाधिवेशन प्रस्ताव लेखन तथा माइन्युट लेखन समितिको जिम्मेवारी उपमहासचिवद्वय प्रदीप ज्ञवाली र पृथ्वीसुब्बा गुरुङलाई दिइएको छ।

महाधिवेशनमा नेतृत्व चयनका विषयमा सहमति जुट्न नसके मतदान प्रक्रियाबाट निर्णय गर्ने तयारी गरिएको छ। त्यसका लागि विद्युतीय भोटिङ मेसिन प्रयोग गर्ने एमालेले जनाएको छ।