नेपाल वायुसेवा निगमले असोज २४ गते काठमाडौँ–भैरहवा उद्धार उडान सञ्चालन गर्ने निर्णय गरेको छ। असोज ११ र १२ गतेको भारी वर्षाले काठमाडौँ उपत्यकाबाट बाहिर जाने तथा भित्र आउने मुख्य राजमार्गहरूमा क्षति पुगेपछि यात्रुहरूलाई सहजताका लागि उद्धार उडानको व्यवस्था गरिएको हो।

निगमले नेपालीहरूको दशैं पर्वको अवसरमा आफ्ना घर फर्किन र काठमाडौँ फर्कन चाहने यात्रुहरूलाई सहुलियत प्रदान गर्न A320 जहाजद्वारा उद्धार उडान सञ्चालन गरिने जानकारी दिएको छ। संस्कृति, पर्यटन तथा नागरिक उड्डयन मन्त्री बद्री प्रसाद पाण्डेको निर्देशन र निगमका कार्यकारी अध्यक्ष युवराज अधिकारीको विशेष पहलमा यो उडान व्यवस्था गरिएको हो।

काठमाडौँबाट भैरहवा बिहान ११ बजे उडान हुनेछ भने भैरहवाबाट काठमाडौँको लागि उडान १२:३० मा हुनेछ। काठमाडौँबाट भैरहवा जाने एकतर्फी भाडा ७ हजार रुपैयाँ तोकिएको छ भने भैरहवाबाट काठमाडौँ फर्किने भाडा ३८९० रुपैयाँ तोकिएको छ।