नेपालको सेयर बजार पछिल्लो समय निरन्तर गिरावटको चपेटामा परेको छ। उतारचढावका बीच सोमबार बजार परिसूचक नेप्से ३०.६० अंकले घटेर २५७०.१८ विन्दुमा बन्द भएको छ, जुन गत मंसिर यताकै (करिब ८ महिनाकै) सबैभन्दा न्यून विन्दु हो।

परिसूचक घटे पनि आज कारोबार रकम भने अघिल्लो दिनको तुलनामा केही बढेको छ। गत आइतबार (वा शुक्रबार) ६ अर्ब ६८ करोड रूपैयाँको सेयर कारोबार भएकोमा सोमबार ७ अर्ब ४६ करोड रूपैयाँ पुगेको छ। तर, यो कारोबार वृद्धि उत्साहजनक नभई लगानीकर्ता भयभीत भएर बजारबाट बाहिरिन खोजेको संकेत (प्यानिक सेल) भएको विश्लेषण गरिएको छ। कुल कारोबारमध्ये झन्डै आधा हिस्सा (३ अर्ब ७० करोड ८९ लाख रुपैयाँ) ऋणपत्र (डिबेन्चर) को मात्रै छ।

सोमबार ३६८ वटा धितोपत्रको ४ करोड १७ लाख २५ हजार ३२३ कित्ता सेयर किनबेच हुँदा २४९ कम्पनीको मूल्य ओरालो लागेको छ भने जम्मा २२ कम्पनीको मात्र बढेको छ। चार कम्पनीको मूल्य स्थिर रह्यो। कारोबारमा आएका १३ वटै उपसमूहको सूचक राताम्मे हुँदा व्यापार समूह सबैभन्दा बढी २.३० प्रतिशतले घटेको छ।

पूँजी बजारलाई अर्थतन्त्रको ऐना मानिए पनि वर्तमान दुई–तिहाइको बलियो सरकार र नीति निर्माताहरूको मौनताले लाखौँ लगानीकर्ताको लगानी जोखिममा परेको भन्दै सामाजिक सञ्जालमा तीव्र आलोचना सुरु भएको छ।

नेपाल सेयरधनी संघका अध्यक्ष घनश्याम पाण्डेले अर्थमन्त्रीलाई बजार जोगाउन (रेस्क्यु गर्न) आपतकालीन आग्रह गरेका छन्। पाण्डेले सरकार, ब्रोकर, लगानीकर्ता र नियामक निकाय (धोतोपत्र बोर्ड/राष्ट्र बैंक) बीच तत्काल खुला छलफल चलाउनुपर्नेमा जोड दिँदै सामाजिक सञ्जालमा लेखेका छन्:- "बजारको वर्तमान अवस्थाको सूक्ष्म विश्लेषण गरी सरकारले जिम्मेवार भएर तत्काल पहलकदमी लिनु आवश्यक छ, ताकि आगामी दिनमा थप दुःखद खबर सुन्न नपरोस्।"

लाखौँ सर्वसाधारणको लगानी जोडिएको बजारमा पैदा भएको यो संकट समाधान गर्न सरकारले भाषणमा मात्र नभई व्यवहारमै देखिने गरी नीतिगत सुधार र अभिभावकीय भूमिका निर्वाह गर्नुपर्ने दबाब बढेको छ।

सोमबारको बजारका मुख्य सूचकहरू
सर्वाधिक कमाउने: सामुदायिक लघुवित्तको सेयर मूल्य ५.३७ प्रतिशतले बढेर प्रति कित्ता ११९७ रूपैयाँ पुग्यो। त्यस्तै १०.२५% सिटिजन बैंक डिबेन्चर २०८६ को मूल्य ५.३१ प्रतिशतले बढेर ११९० रूपैयाँ कायम भएको छ ।

सर्वाधिक गुमाउने: उपकार लघुवित्तको सेयर मूल्य ११.२८ प्रतिशतको गम्भीर गिरावटसहित २८३९ रूपैयाँमा झर्‍यो भने बुद्धभूमि नेपाल हाइड्रोपावरको मूल्य पनि ७.४७ प्रतिशतले घटेर २७५ रूपैयाँमा सीमित भएको छ ।

बढी कारोबार हुने: एनएमबी डिबेन्चर ८.५०% (२०८७/८८) को सर्वाधिक ४८ करोड ४६ लाख रुपैयाँ बराबरको कारोबार भयो। दोस्रो स्थानमा १०% एनआइसी एसिया डिबेन्चर (२०८५/८६) को ४६ करोड ६५ लाख रूपैयाँको कारोबार भयो।