शुक्रबार सुनको मूल्य तोलामा ५०० रुपैयाँले बढेको छ, जसका कारण सुनको मूल्य हालसम्मकै उच्च स्तरमा पुगेको छ। बिहीबार १ लाख ६० हजार ७०० रुपैयाँमा कारोबार भएको सुन शुक्रबार १ लाख ६१ हजार २०० रुपैयाँ पुगेको छ। पछिल्लो समय हरेक दिन सुनको मूल्यमा नयाँ रेकर्ड कायम हुन थालेको देखिएको छ।

नेपाल सुनचाँदी व्यवसायी महासंघका पूर्वअध्यक्ष मणिरत्न शाक्यका अनुसार, सुनको मूल्यमा भइरहेको यो वृद्धिमा नेपाल भित्रको आन्तरिक बजारको भूमिका अत्यन्तै न्यून छ। उनले भने, “सुनको मूल्य घटबढ हुनुमा मुख्यतया अन्तर्राष्ट्रिय बजार र वैश्विक घटनाक्रमको भूमिका हुन्छ। हाल अमेरिकी केन्द्रीय बैंक (फेडरल रिजर्भ) ले ब्याजदर घटाएको छ, जसले गर्दा लगानीकर्ताहरू सुरक्षित लगानीको खोजीमा सुनतर्फ आकर्षित भएका छन्।”

शाक्यले सुनको मूल्य वृद्धिमा अन्य अन्तर्राष्ट्रिय घटनाक्रमहरूको पनि योगदान रहेको उल्लेख गरे। “रसिया–युक्रेन युद्ध, इजरायल–प्यालेस्टिन विवादजस्ता वैश्विक तनावहरूले लगानीकर्तालाई अस्थिर बनाएको छ, जसले गर्दा सुनको माग बढेको छ र मूल्यमा पनि त्यसको प्रभाव देखिएको छ,” उनले थपे।

चाँदीको मूल्य स्थिर

शुक्रबार चाँदीको मूल्य भने स्थिर रहेको छ। बिहीबारको मूल्य अनुसार नै चाँदी प्रतितोला १ हजार ९५५ रुपैयाँमा कारोबार भइरहेको छ। सुनको मूल्यमा वृद्धि भए पनि चाँदीको मूल्यमा भने कुनै परिवर्तन आएको छैन।

सुन र चाँदीको मूल्यमा देखिएको यो भिन्नता वैश्विक बजारमा सुनको अत्यधिक माग र चाँदीको तुलनात्मक स्थिरतालाई संकेत गर्छ। आगामी दिनमा सुनको मूल्य अझै बढ्न सक्ने अनुमान गरिएको छ, किनकि वैश्विक अनिश्चितताहरू कायम छन्।