कागेश्वरी मनोहरा नगरपालिका–५, थलीस्थित भीमबारी टोलमा बुधबार बिहान एक व्यक्तिले आफ्ना छोरा र बुहारीमाथि खुकुरी प्रहार गरेका छन्।

जिल्ला प्रहरी परिसर काठमाडौंका प्रवक्ता प्रहरी वरिष्ठ उपरीक्षक (एसपी) पवन भट्टराईका अनुसार ५३ वर्षीय विष्णु उप्रेतीले घरायसी विवादका क्रममा छोरा र बुहारीमाथि आक्रमण गरेका हुन्।

खुकुरी प्रहारबाट उनका ३२ वर्षीय छोरा रुविस उप्रेती र बुहारी मनिता भण्डारी घाइते भएका छन्। रुविसको बायाँ हातका चार औंला काटिनुका साथै दाहिने खुट्टाको घुँडामा चोट लागेको छ भने मनिताको दाहिने हातको कुममा चोट लागेको प्रहरीले जनाएको छ।

घाइते दुवै जनाको उपचार भइरहेको र उनीहरू अमेरिकाबाट दशैं–तिहार मनाउन नेपाल आएका थिए।

आक्रमण गर्ने बुबा विष्णु उप्रेतीलाई प्रहरीले नियन्त्रणमा लिएर गोकर्ण प्रभागको हिरासतमा राखेको छ। घटनाबारे थप अनुसन्धान भइरहेको प्रहरीले जनाएको छ।