वैदेशिक रोजगारीमा आकर्षक तलब दिने प्रलोभन देखाएर रकम ठगी गर्ने आरोपीलाई प्रहरीले पक्राउ गरेको छ। भक्तपुर, मध्यपुर थिमी नगरपालिका-१ बस्ने ३१ वर्षीय राहुल पुन्जलाई आइतबार पक्राउ गरिएको हो।

उक्त व्यक्तिले धनुषा, जनकनन्दिनी गाउँपालिका-३ घर भएका एक व्यक्तिबाट युके पठाइदिन्छु भन्दै ४२ लाख रुपैयाँ लिएको र त्यसपछि सम्पर्कविहीन बनेको उजुरी परेको थियो। उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले उनलाई काठमाडौं महानगरपालिका-११ बाट पक्राउ गरेको हो।

प्रहरीले आवश्यक अनुसन्धान र कारवाहीका लागि राहुललाई वैदेशिक रोजगार विभाग, ताहाचल काठमाडौं पठाएको जनाएको छ।