नेकपा (एकीकृत समाजवादी) का उपमहासचिव मेटमणि चौधरीलाई पार्टीले तीन दिने स्पष्टीकरण सोधेको छ। भदौ २५ गते प्राइम टिभीमा दिएको अन्तरवार्तामा चौधरीले लिपुलेक र कालापानी भारतको दाबीमा पर्ने अभिव्यक्ति दिएका कारण पार्टीले उनलाई लिखित जवाफ दिन भनेको हो।

चौधरीको अभिव्यक्तिले मुलुकको अखण्डता र सार्वभौमिकतामा प्रश्न उठाएको भन्दै, महासचिव घनश्याम भूसालले बिहीबार स्पष्टीकरण पत्र पठाएका छन्। 

पत्रमा नेपालको संविधानले लिपुलेक र कालापानीलाई नेपालको भूभागका रूपमा स्पष्ट रूपमा समेटेको कुरा उल्लेख गर्दै चौधरीलाई सोधिएको छ, “तपाईंले देशको अखण्डताविपरीत यस्तो अभिव्यक्ति किन दिनुभएको हो?” पार्टीले तीन दिनभित्र चौधरीबाट लिखित जवाफको अपेक्षा राखेको छ।