विश्वासको मत सिद्ध गर्न नसक्दा मधेश प्रदेश सरकारका मुख्यमन्त्री जितेन्द्र सोनलले शनिबार पदबाट राजीनामा दिएका छन्। असोज २९ मा पाँच दलको समर्थनमा मुख्यमन्त्री बनेका सोनलको सरकार २५ दिनमै ढलेको हो।

पूर्वनिर्धारित कार्यक्रमअनुसार शनिबार प्रदेशसभामा सोनलले विश्वासको मत लिने तालिका तय गरिएको थियो। तर प्रदेशसभामा उपस्थित १०७ सदस्यमध्ये आवश्यक बहुमतका लागि ५४ मत भए पनि अन्तिम क्षणमा नेकपा माओवादी केन्द्रभित्रको आन्तरिक विवाद, जनमत पार्टीको विभाजन र केही दलका सांसदहरूको अनुपस्थितिले विश्वासको मत जुटाउन असम्भव बनाएको थियो।

सोनलको सरकार सुरु हुँदै नै संकटमा

सोनललाई ५६ सांसदको समर्थनमा प्रदेश प्रमुख सुमित्रा सुवेदी भण्डारीले मुख्यमन्त्री नियुक्त गरेकी थिइन्। यसमा जनता समाजवादी पार्टी (१९), जनमत पार्टी (१३), माओवादी केन्द्र (९), नेकपा एस (७) र लोसपा (८) को समर्थन समावेश थियो।

तर नियुक्ति दिनै जनमत पार्टी विभाजन भएको थियो। निर्वाचित मुख्यमन्त्री सतिशकुमार सिंह र त्रिभुवन साहले जनस्वराज पार्टीको पक्षमा सनाखत गरेका थिए। त्यसपछि जसपा नेपालका सांसद सरोजसिंह कुश्वाहाको भ्रष्टाचार मुद्दा देखाउँदै अख्तियारले पक्राउ गरेपछि उनी निलम्बनमा परेका थिए। यसले सरकार सुरुदेखि नै नैतिक संकटमा परेको संकेत दियो।

सोनलले विश्वासको मत पाउन नागरिक उन्मुक्ति पार्टी र नेपाल संघीय समाजवादी पार्टीका केही सांसदलाई आफ्नो पक्षमा ल्याएका थिए। तर माओवादी केन्द्रभित्रको विद्रोह र जनमत पार्टी विभाजनले सरकारलाई बाधा पुर्‍यायो।

प्रदेशसभामा विश्वासको मतको लागि बैठक दिउँसो १ बजे आह्वान गरिएको थियो। शुरुवाती रूपमा ५७ मत भएकोले सोनल ढुक्क थिए। तर बैठक सुरु हुनासाथ सत्ता पक्षका ५४ सांसद मात्रै उपस्थित थिए। नेकपा माओवादी केन्द्रका सांसद रहबर अन्सारीले समय माग्दै विरोध जनाए र आफैंलाई कालोमोसो दलेर विरोध प्रदर्शन गरेका थिए । माओवादीकै अर्की सांसद माला कर्णले पनि सरकारलाई विश्वासको मत नदिने घोषणा गरेकी थिइन्।

माओवादी केन्द्रभित्रको विवाद के हो?

माओवादी केन्द्रमा संसदीय दलको नेताको विषयमा विवाद थियो। प्रचण्डले नेता भरतप्रसाद साहलाई पुनः दलको नेता बनाएपछि अन्य सांसदहरू असन्तुष्ट थिए। यही असन्तुष्टि प्रदेशसभामा विश्वासको मत नपाउने मुख्य कारण बनेको थियो।

विश्वासको मत नपाउँदा सोनलले बैठकबाट बाहिर निस्केर राजीनामा घोषणा गरेका थिए । उनले भने, “फेरि पनि वैधानिक रूपमा सरकार गठन प्रक्रिया अगाडि बढोस् भनेर मैले यो कदम चालें। अब कसैको खेल चल्दैन। जसको बहुमत हुन्छ, उसले सरकार बनाउँछ।”

प्रदेश प्रमुख सुमित्रा सुवेदी भण्डारीले शनिबार सोनलको राजीनामा स्वीकृत गरेकी छन्। सोनलले राजीनामा दिए पनि फेरि बहुमतसहित दाबी गर्न सक्ने संकेत दिएका छन्।