काठमाडौँ महानगरपालिकाका प्रमुख बालेन शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच चुनावी सहकार्यका लागि भइरहेको संवाद निष्कर्षविहीन बनेको छ । शुक्रबार दोस्रो तहका नेताहरूले सहमतिको मस्यौदा तयार पारे पनि शनिबारसम्म शीर्ष नेतृत्वबीच हस्ताक्षर हुन नसक्दा एकता प्रक्रिया अन्योलमा परेको हो ।

विवादको मुख्य जड: शक्ति बाँडफाँट बालेनपक्षीय स्रोतका अनुसार रास्वपाले चुनावी तालमेलमा ३० प्रतिशतभन्दा बढी हिस्सा दिन नसकिने अडान राखेपछि सहमति बिथोलिएको हो । बालेनले कुलमान घिसिङ, जनमत पार्टी, नागरिक उन्मुक्ति पार्टी र विभिन्न स्वतन्त्र शक्तिहरूलाई समेत समेट्ने गरी कम्तीमा ५० प्रतिशत हिस्सा माग गरेका थिए । तर, रास्वपा पक्षले ३० प्रतिशतको सीमाभित्रै सबैलाई अटाउनुपर्ने अडान राखेपछि बालेन पछि हटेका हुन् ।

कुलमानसँगको छलफल र नयाँ रणनीतिबारे शनिबार बालेन शाह र कुलमान घिसिङबीच भएको छुट्टै छलफलले रास्वपाले केवल समय कटाउन मात्र खोजेको निष्कर्ष निकालेको छ । सोही निष्कर्षपछि बालेन र कुलमानको समूहले आफ्नै नेतृत्वमा समानुपातिक उम्मेदवारहरूको अन्तिम सूची तयार पार्न गृहकार्य सुरु गरेको छ । सोमबार निर्वाचन आयोगमा बुझाउने गरी उम्मेदवारहरूको नाम तय गर्न यो समूह रातभर कसरतमा जुटेको छ ।

गठबन्धनमा रहेका शक्तिहरू बालेनसँग अहिले नागरिक उन्मुक्तिका दुवै धार, जनमत पार्टी, हाम्रो नेपाली पार्टी, कांग्रेस नेता सुनिल शर्मा, राप्रपाका ज्ञानेन्द्र शाहीसहित ठुलो संख्यामा युवा उद्यमी र 'जेनजी' (Gen-Z) का प्रभावशाली व्यक्तित्वहरू जोडिएका छन् । बालेनले युवा शक्तिलाई गोलबन्द गर्ने जिम्मेवारी रक्षा बम र सुधन गुरुङलाई सुम्पिएका छन् ।

रास्वपाको आन्तरिक तयारी यता रास्वपाले भने आफ्नो तर्फबाट समानुपातिक उम्मेदवार छनोटका लागि आन्तरिक 'प्राइमरी इलेक्सन' सुरु गरिसकेको छ । शनिबार बिहानदेखि सुरु भएको मतदान आइतबार रातिसम्म चल्नेछ, जसबाट ११० जनाको अन्तिम सूची तयार पारिनेछ । रास्वपाको यो प्रक्रियाले पनि बालेन र कुलमानको समूहलाई थप सशंकित बनाएको छ ।