काठमाडौँ महानगरपालिकाको मेयरमा स्वतन्त्र उम्मेदवारी दिएर ऐतिहासिक जित हासिल गरेका बालेन्द्र शाह (बालेन) अन्ततः राजनीतिक दलमा आबद्ध भएका छन् । उनी राष्ट्रिय स्वतन्त्र पार्टी (रास्वपा) मा समाहित हुने सहमतिमा पुगेका हुन् ।

आइतबार बिहान भएको सहमतिअनुसार रास्वपाले बालेनलाई भावी प्रधानमन्त्रीका रूपमा अघि सार्ने निर्णय गरेको छ । यससँगै बालेनको स्वतन्त्र राजनीतिक पहिचान समाप्त भएको छ । २१ फागुनमा हुने प्रतिनिधिसभा निर्वाचनपछि संसदीय दलको नेताको रूपमा चयन भए प्रधानमन्त्री बन्ने अवसर आए बालेनलाई अघि बढाइने सहमति भएको हो ।

दुई पक्षबीच भएको सम्झौतामा पार्टीको नाम, झण्डा र चुनाव चिन्ह यथावत् रूपमा राष्ट्रिय स्वतन्त्र पार्टी र ‘घण्टी’ नै रहने उल्लेख छ । यसअघि बालेनले काठमाडौँ महानगरपालिकाको मेयर निर्वाचनमा ‘लौरो’ चुनाव चिन्ह प्रयोग गरेका थिए । उनी आफ्नै नेतृत्वमा नयाँ दल दर्ता गरी ‘लौरो’ चिन्हमै अघि बढ्ने तयारीमा थिए । सोही क्रममा रास्वपासँग पनि निरन्तर वार्ता चलिरहेको थियो । एकतापछिको पार्टीको चुनाव चिन्ह ‘लौरो’ बनाउने विषयमा समेत छलफल भए पनि अन्ततः सहमति जुट्न सकेन ।

नयाँ दल खोलेर राजनीतिक चुनौती लिनेभन्दा रास्वपामै समाहित भएर अघि बढ्ने निष्कर्षमा बालेन पुगेका हुन् । चुनाव चिन्ह ‘घण्टी’ नै रहने विषयमा उनले कुनै विवाद नगरेको देखिन्छ । सम्झौतापत्रमा हस्ताक्षर गरेपछि बालेनले फेसबुकमा ‘घण्टी’ बजाएको इमोजीसहित ‘शुभ प्रभात’ लेख्दै सहमतिलाई सार्वजनिक संकेत दिएका थिए ।

राष्ट्रिय स्वतन्त्र पार्टीका सभापति रवि लामिछाने र काठमाडौँ महानगरपालिकाका मेयर बालेन शाहबीच प्रतिनिधिसभा निर्वाचनमा एउटै दलबाट प्रतिस्पर्धा गर्ने घोषणासहित सातबुँदे सम्झौता भएको हो । सम्झौताअनुसार, पार्टीको नेतृत्व रवि लामिछानेले गर्नेछन् भने आगामी प्रधानमन्त्रीका उम्मेदवारका रूपमा बालेन शाहलाई संसदीय दलको नेताको रूपमा अघि सारिनेछ ।

सम्झौतापत्रमा रवि लामिछाने र बालेन शाह दुवैले आफ्नो पदीय हैसियत उल्लेख नगरी नाममात्रै लेखेर हस्ताक्षर गरेका छन् । सम्झौतामा राष्ट्रिय स्वतन्त्र पार्टीको विषयवस्तु उल्लेख भए पनि रवि लामिछानेले सभापतिको हैसियतमा हस्ताक्षर गरेका छैनन् । त्यस्तै, बालेन शाहले पनि मेयरको हैसियत खुलाएका छैनन् । सम्झौतापछि बालेन शाहले मेयर पदबाट राजीनामा दिएर पूर्ण रूपमा पार्टी राजनीतिमा सक्रिय हुने सम्भावना देखिएको छ ।

सम्झौतापत्रको पहिलो बुँदामा नवयुवा (जेन–जी) ले भ्रष्टाचार र कुशासनविरुद्ध गरेको आन्दोलनको अपनत्व लिने उल्लेख छ । आन्दोलनका क्रममा घाइते भएका तथा शहीद परिवारका माग सम्बोधन गर्ने प्रतिबद्धता पनि जनाइएको छ ।

दोस्रो बुँदामा समुन्नति र सामाजिक न्यायका लागि नीतिगत, संस्थागत तथा संरचनागत सुधार गर्ने प्रतिबद्धता व्यक्त गरिएको छ । नेपाललाई आगामी १० वर्षभित्र सम्मानजनक मध्यम आय भएको मुलुक बनाउने लक्ष्यमा इमान्दारीपूर्वक समर्पित हुने उल्लेख गरिएको छ ।

रवि लामिछाने र बालेन शाहले आफूहरूलाई पहिलो र दोस्रो पक्षका रूपमा प्रस्तुत गर्दै बृहत् एकताको उद्घोष गरेका छन् । पार्टीको नाम, चिन्ह र झण्डा यथावत् रहने स्पष्ट पारिएको छ ।

सम्झौतापत्रमा ‘राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधिसभा निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने’ उल्लेख छ ।

पटक–पटक एकताको छलफल भए पनि सम्झौतापत्रमा कुलमान घिसिङ र उनी आबद्ध उज्यालो नेपाल पार्टीबारे कुनै उल्लेख छैन । यद्यपि, बृहत् एकताको क्रममा अन्य वैकल्पिक शक्तिहरूलाई पनि समेट्ने संकेत गरिएको छ ।

सम्झौतामा पार्टीको संगठनात्मक संरचना थप सक्षम र फराकिलो बनाउँदै युवा अभियन्ता र अनुभवी विज्ञहरूलाई योग्यता, समावेशिता र सार्वजनिक छविका आधारमा जिम्मेवारी दिने उल्लेख छ ।

यो सम्झौता तत्काल कार्यान्वयन गर्ने योजना अनुसार निर्वाचन आयोगमा रहेको राष्ट्रिय स्वतन्त्र पार्टीको अभिलेख तथा दस्तावेज अद्यावधिक गर्ने घोषणा गरिएको छ ।

घोषणाअनुसार अब बालेन पक्षका समानुपातिक उम्मेदवारहरू रास्वपाबाटै प्रतिस्पर्धा गर्नेछन् । सम्भवतः दुई दिनभित्र आपसी सहमतिमा समानुपातिक उम्मेदवारको सूची निर्वाचन आयोगमा बुझाइनेछ । प्रत्यक्षतर्फको मनोनयनका लागि भने अझै करिब तीन साता समय बाँकी छ ।