प्रधानमन्त्रीका प्रमुख सल्लाहकारको नाम तथा पद दुरुपयोग गरी इजरायल पठाइदिने प्रलोभन देखाएर अढाई करोड रुपैयाँभन्दा बढी ठगी गर्ने दुई जनालाई केन्द्रीय अनुसन्धान ब्युराे (सीआईबी) ले पक्राउ गरेको छ। 

नेपाल र इजरायल सरकारबीच भएको सम्झौताअनुसार केयर गिभरका रूपमा इजरायल जान सन् २०२४ मा लिइएको परीक्षामा सहभागी भई लक्की ड्रमा नाम नपरेका १५६ जनालाई वैदेशिक रोजगारीमा पठाइदिने विश्वास दिलाउँदै उनीहरूले प्रतिव्यक्ति ६ लाख २० हजार रुपैयाँका दरले रकम असुलेका थिए। 

पीडितहरूको जाहेरीका आधारमा गत असोज १ गते पक्राउ परेका रामेछापका ५९ वर्षीय भरत चौलागाईं र दोलखाकी ३२ वर्षीया बालिका सिवाकोटीविरुद्ध अहिले मुलुकी अपराध संहिता, २०७४ को परिच्छेद २१ अन्तर्गत ठगीसम्बन्धी कसुरमा काठमाडौं जिल्ला अदालतबाट म्याद थप गरी आवश्यक अनुसन्धान भइरहेको प्रहरीले जनाएको छ।