पाकिस्तानका पूर्वप्रधानमन्त्री इमरान खान को स्वास्थ्य अवस्था जेलभित्र अत्यन्तै नाजुक बनेको खुलासा भएको छ। सर्वोच्च अदालतले नियुक्त गरेका एमिकस क्युरी (अदालतका सहयोगी) ब्यारिस्टर सलमान सफदरका अनुसार ७३ वर्षीय खानको दायाँ आँखाको दृष्टि अहिले मात्र १५ प्रतिशत बाँकी रहेको छ।
अधिकारीहरूले तीन महिनासम्म उनको गुनासोलाई बेवास्ता गर्दा अवस्था गम्भीर बनेको दाबी गरिएको छ। ब्यारिस्टर सफदरले फेब्रुअरी १० मा अडियाला जेलमा खानसँग दुई घण्टा लामो भेटवार्ता र कारागार निरीक्षणपछि बुधबार सर्वोच्च अदालतमा सात पृष्ठको विस्तृत प्रतिवेदन बुझाएका थिए।
रिपोर्टअनुसार सन् २०२३ अगस्टदेखि थुनामा रहेका खानले पछिल्लो तीन महिनादेखि धमिलो देख्ने समस्या दोहोर्याएर जानकारी गराए पनि जेल प्रशासनले आवश्यक उपचारमा चासो नदेखाएको उल्लेख छ। फेब्रुअरी ६ को मेडिकल रिपोर्टले दायाँ आँखाको नसामा रगत जमेको पुष्टि गरेको छ, जसले रेटिनामा स्थायी क्षति पुर्याउने जोखिम रहेको जनाइएको छ।
सर्वोच्च अदालतको हस्तक्षेप
खानको स्वास्थ्य अवस्थालाई लिएर सर्वोच्च अदालत पाकिस्तानले गम्भीर चासो देखाएको छ। प्रधानन्यायाधीश याह्या अफ्रिदीले स्वास्थ्य सबैभन्दा प्राथमिक विषय भएको भन्दै तत्काल हस्तक्षेप आवश्यक रहेको बताएका छन्।
अदालतले विशेषज्ञ चिकित्सक टोलीमार्फत आँखाको विस्तृत परीक्षण गर्न तथा फेब्रुअरी १६ भित्र बेलायतमा रहेका उनका छोराहरूसँग फोन सम्पर्क गराउन जेल प्रशासनलाई निर्देशन दिएको छ।
पार्टीको आक्रोश
पाकिस्तान तेहरिक-ए-इन्साफ (पीटीआई) ले घटनालाई राज्यद्वारा गरिएको क्रूरताको संज्ञा दिएको छ। पार्टीले खानको स्वास्थ्यमा पुगेको कुनै पनि क्षतिको जिम्मेवारी सम्बन्धित निकायले लिनुपर्ने चेतावनी दिएको छ।
पीटीआईले तत्काल निजी चिकित्सकमार्फत उपचार गराउन र विशेषज्ञ अस्पतालमा स्थानान्तरण गर्न माग गरेको छ। साथै, परिवार र वकिलसँगको भेटघाटमा लगाइएको प्रतिबन्ध हटाउनुपर्ने बताएको छ।
सन् २०१८ मा प्रधानमन्त्री बनेका खान २०२२ मा अविश्वासको प्रस्तावमार्फत पदमुक्त भएका थिए। त्यसयता उनी सयौँ कानुनी मुद्दाको सामना गरिरहेका छन्। हालको प्रतिवेदनले उनी करिब दुई वर्ष चार महिनादेखि एकान्त कारावासमा रहेको उल्लेख गरेको छ।
सन् २०२४ जुनमा संयुक्त राष्ट्रसंघको कार्यदलले पनि उनको थुनालाई कानुनी आधारविहीन भन्दै राजनीतिबाट अलग राख्ने उद्देश्यले प्रेरित भएको निष्कर्ष निकालेको थियो। खानले भने आफ्नो गिरफ्तारी र सत्ताच्युत हुनुमा सैन्य नेतृत्व तथा विदेशी शक्तिको संलग्नता रहेको आरोप लगाउँदै आएका छन्।
तपाईको प्रतिक्रिया दिनुहोस