हाल देशभर मनसुनी वायुको प्रत्यक्ष प्रभाव रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा नेपालको पूर्वी भूभागमा सरदर स्थान आसपास र पश्चिमी भूभागमा सरदरभन्दा केही उत्तरतर्फ (नेपाल नजिक) अवस्थित छ।

महाशाखाका अनुसार हाल देशभर साधारणतया बदली रही बागमती, गण्डकी, कर्णाली र सुदूरपश्चिम प्रदेशका थोरै स्थानहरूमा तथा लुम्बिनी र मधेस प्रदेशका एक-दुई स्थानमा हल्कादेखि मध्यम वर्षा भइरहेको छ।

आज दिउँसोको मौसम
देशका हिमाली तथा पहाडी भूभागका साथै बागमती, गण्डकी, लुम्बिनी र सुदूरपश्चिमका तराई क्षेत्रमा साधारणतया बदली रहनेछ भने मधेस र कोशी प्रदेशको तराईमा आंशिक बदली हुनेछ। हिमाली भूभागका केही र पहाडी भूभागका धेरै स्थानहरूमा चट्याङ्गसहित मध्यम वर्षाको सम्भावना छ।

त्यस्तै, लुम्बिनी र सुदूरपश्चिमका तराईका धेरै स्थान, बागमती र गण्डकीका तराईका केही स्थान तथा कोशी र मधेस प्रदेशका थोरै स्थानमा चट्याङ्गसहित मध्यम वर्षाको अनुमान गरिएको छ। लुम्बिनी, सुदूरपश्चिम, बागमती, गण्डकी र कर्णाली प्रदेशका एक-दुई स्थानमा भारी वर्षाको समेत सम्भावना रहेको छ।

आज रातिको मौसम
राति देशका हिमाली, पहाडी र अधिकांश तराई भूभागमा साधारणतया बदली रहनेछ। हिमाली भूभागका थोरै र पहाडी भूभागका केही स्थानमा चट्याङ्गसहित मध्यम वर्षाको सम्भावना छ। बागमती, गण्डकी र लुम्बिनीका पहाडी तथा तराई क्षेत्रका एक-दुई स्थानमा राति पनि भारी वर्षा हुन सक्ने महाशाखाले जनाएको छ।