चालु आर्थिक वर्षका पहिलो चार महिनामा वीरगञ्ज नाका हुँदै ५४ अर्ब १२ करोड रुपैयाँ बराबरको पेट्रोलियम पदार्थ आयात भएको छ।

डिजेल, पेट्रोल, एलपी ग्यास, एटिएफ (एभिएसन टर्बाइन फ्युल) तथा मट्टितेल आयातबाट चार महिनामा २२ अर्ब ९० करोड रुपैयाँ राजस्व संकलन भएको वीरगञ्ज भन्सार कार्यालयले जनाएको छ। यो अघिल्लो आर्थिक वर्षको सोही अवधिका तुलनामा २ अर्ब ९३ करोड रुपैयाँ बढी हो।

गत आवको चार महिनामा ५१ अर्ब १९ करोड रुपैयाँ बराबरको पेट्रोलियम पदार्थ आयात हुँदा २० अर्ब ८९ करोड राजस्व संकलन भएको थियो। चालु आवमा आयात र राजस्व दुवै बढेको भन्सार कार्यालयका प्रमुख प्रशासक विष्णुप्रसाद ज्ञवालीले बताएका छन्। “गत वर्षको तुलनामा पेट्रोलियम पदार्थ आयातबाट उठ्ने राजस्व नौ दशमलव ६० प्रतिशतले बढेको छ,” उनले भने।

डिजेल आयातमा वृद्धि

चालु आवको कात्तिक मसान्तसम्म २४ अर्ब ४० करोड रुपैयाँ बराबरको २ लाख ६८ हजार ६७६ किलोलिटर डिजेल आयात भएको छ । यसबाट १० अर्ब ७३ करोड राजस्व संकलन भएको छ। गत आवको सोही अवधिमा २१ अर्ब ८३ करोड मूल्य बराबरको डिजेल आयात हुँदा ९ अर्ब ७८ करोड राजस्व संकलन भएको थियो।

पेट्रोल आयातमा समेत वृद्धि

चार महिनामा १४ अर्ब २७ करोड रुपैयाँ बराबरको १ लाख ६६ हजार ६६३ किलोलिटर पेट्रोल आयात भएको छ । यसबाट ९ अर्ब ४३ करोड राजस्व संकलन भएको छ। गत आवको सोही अवधिमा १२ अर्ब ४३ करोड रुपैयाँ बराबरको पेट्रोल आयात हुँदा ८ अर्ब ११ करोड राजस्व संकलन भएको थियो।

एलपी ग्यास आयातमा कमी

चालु आवको पहिलो चार महिनामा एलपी ग्यास ९ करोड ७३ लाख ९६ हजार ४७२ किलोग्राम आयात भएको छ । यसबाट १ अर्ब ८३ करोड राजस्व संकलन भएको छ। गत आवको सोही अवधिमा भने ११ अर्ब १० करोड मूल्य बराबरको १० करोड ३ लाख ५९ हजार किलोग्राम एलपी ग्यास आयात भएपछि २ अर्ब ८ करोड राजस्व संकलन भएको थियो।