नेपाल आयल निगमले सोमबार मध्यरातदेखि लागू हुने गरी पेट्रोलियम पदार्थको नयाँ मूल्यसूची सार्वजनिक गरेको छ। नयाँ समायोजन अनुसार डिजेल/मट्टीतेलको मूल्य प्रतिलिटर एक रुपैयाँले घटाइएको छ भने हवाई इन्धन आन्तरिक र अन्तर्राष्ट्रिय दुवै तर्फमा मूल्य बढाइएको निगमले जनाएको छ।

निगमका अनुसार भारतबाट आएको नयाँ मूल्यसूची प्राप्त भएपछि डिजेल, मट्टीतेल र हवाई इन्धनको मूल्य हेरफेर गरिएको हो। पेट्रोल र खाना पकाउने एलपी ग्यासको खुद्रा मूल्य भने जस्ताको त्यस्तै राखिएको छ।

नयाँ दरअनुसार डिजेल–मट्टीतेलका लागि देश तीन वर्गमा विभाजन गरिएको छ। पहिलो वर्गका चारआली, विराटनगर, वीरगन्ज, जनकपुर, अमलेखगञ्ज, भलवारी, नेपालगन्ज र धनगढी क्षेत्रमा प्रतिलिटर १४३ रुपैयाँ ५० पैसा पर्नेछ। दोस्रो वर्गमा पर्ने सुर्खेत र दाङ क्षेत्रमा नयाँ मूल्य १४५ रुपैयाँ कायम गरिएको छ। तेस्रो वर्गमा पर्ने काठमाडौं, पोखरा र दिपायल क्षेत्रमा प्रतिलिटर १४६ रुपैयाँ तोकिएको छ।

हवाई इन्धन आन्तरिक उडानका लागि प्रतिलिटर ६ रुपैयाँले महँगो भएर नयाँ दर १३४ रुपैयाँ पुगेको छ। अन्तर्राष्ट्रिय उडानका लागि भने प्रतिकिलोलीटर अमेरिकी डलर ४२ ले मूल्य वृद्धि गरिएको छ। नयाँ दरअनुसार काठमाडौंमा १०१४ डलर, पोखरामा ८४२ डलर र भैरहवामा ८२९ डलर प्रतिकिलोलीटर कायम गरिएको छ।

निगमले पेट्रोलियम पदार्थको मूल्य निर्धारणमा क्षेत्रगत भौगोलिक आधार अपनाउँदै आएको छ र नयाँ मूल्यसूची पनि यही वर्गीकरणअनुसार नै लागू हुने जनाएको छ।