आन्तरिक राजस्व विभागले वस्तु तथा सेवाको खरिद–बिक्री गर्दा अनिवार्य रूपमा बीजक (बिल) लिन र दिन उपभोक्ता तथा व्यवसायीहरूलाई आग्रह गरेको छ। कर अनुपालन अभिवृद्धि गर्न र वास्तविक कारोबारलाई कर प्रणालीको दायरामा ल्याउन विभागले सार्वजनिक सूचनामार्फत यस्तो अनुरोध गरेको हो।

करदातालाई प्रोत्साहन गर्न हाल ‘उपहार कार्यक्रम’ समेत सञ्चालन भइरहेको विभागले जनाएको छ। उक्त कार्यक्रममा सहभागी भई पुरस्कार दाबी गर्न खरिद बिल अनिवार्य हुने भएकाले उपभोक्तालाई सामान वा सेवा लिँदा अनिवार्य रूपमा बिल माग्न आग्रह गरिएको छ।

यसैगरी, हालसम्म स्थायी लेखा नम्बर (प्यान) लिई व्यवसाय सञ्चालन नगरेकाहरूलाई तत्काल प्यान लिएर कानुनी दायरामा आउन विभागले ताकेता गरेको छ। वस्तु तथा सेवा बिक्री गर्दा उपभोक्तालाई अनिवार्य रूपमा बिक्री बिल जारी गर्नुपर्ने कानुनी व्यवस्थाको स्मरण गराउँदै विभागले यस कदमले कर प्रणालीलाई थप पारदर्शी बनाउने स्पष्ट पारेको छ।