नेपाल वित्तीय संस्था कर्मचारी संघले नेपाल राष्ट्र बैंकका कार्यकारी निर्देशक डा. गुणाकर भट्टको राजीनामा स्वीकृत गर्न नसक्नु कामु गभर्नर निलम तिम्सिना ढुंगानाको "लाचारीपन" को प्रतीक भएको आरोप लगाएको छ ।

संघका अध्यक्ष हरिकृष्ण भट्टराई र महासचिव संजिव बखेलले मंगलबार संयुक्त विज्ञप्ति जारी गर्दै गभर्नरको दावेदारी गर्दै आएकी ढुंगानाले वैशाख ५ गते बुझाइएको राजीनामा स्वीकृत गर्न नसक्नु दुर्भाग्यपूर्ण भएको बताएका छन् । “आफूलाई योग्य भन्दै गभर्नर बन्ने आकांक्षा राख्ने नेतृत्वले एक कर्मचारीको राजीनामा स्वीकृत गर्न नसक्नु नैतिक र व्यवस्थापकीय कमजोरीको संकेत हो,” विज्ञप्तिमा उल्लेख छ ।

संघले यस्तो कार्य संविधानको धारा २९, श्रम ऐन २०७४ को दफा १४१, सुशासन नियमावली २०६५ को नियम ३५ र राष्ट्र बैंक कर्मचारी सेवा विनियमावली २०६८ को समेत ठाडो उल्लंघन भएको दाबी गरेको छ ।

संघको आरोप छ कि गभर्नरजस्तो संवेदनशील पद राजनीतिक दाउपेचमा फसाइएको छ र वर्तमान नेतृत्व त्यसमा संलग्न देखिएको छ । “राष्ट्र बैंकको गरिमा माथि प्रश्न उठ्ने अवस्था सिर्जना हुनु दुःखद छ,” विज्ञप्तिमा भनिएको छ ।

एक महिनासम्म गभर्नरको नियुक्ति हुन नसकेको अवस्थामा केन्द्रीय बैंक नीतिगत निर्णय गर्न असमर्थ भएको र बजेट निर्माणको संवेदनशील समयमा प्रभावहीन बन्नु सरकारको उदासिनताको नतिजा भएको संघको टिप्पणी छ ।

संघले सक्षम व्यक्तिलाई यथाशीघ्र गभर्नरमा नियुक्त गर्न सरकारलाई अपिल गरेको छ । मंगलबार संघका प्रतिनिधिहरूले कार्यवाहक गभर्नर ढुंगानासँग भेट गरी आपत्ति राखेका थिए । भेटका क्रममा ढुंगानाले आफू पूर्ण गभर्नर नभएकाले राजीनामा स्वीकृत गर्न नसक्ने जवाफ दिएकी थिइन् ।