जेनजी आन्दोलनको अवसर पारी सुन्धारास्थित कारागार कार्यालय जगन्नाथदेवलबाट फरार भएका दुई कैदीबन्दी पक्राउ परेका छन्।

नेपाल प्रहरीको केन्द्रीय अनुसन्धान ब्यूरो (CIB) को टोलीले सोमबार धादिङकी ४४ वर्षीया गीता लामा र काठमाडौँका ३३ वर्षीय मंगल महर्जनलाई अलग–अलग स्थानबाट पक्राउ गरेको हो। लामा ‘जीउ मास्ने’ मुद्दामा र महर्जन ‘सुन भन्सार चोरी पैठारी’ मुद्दामा कैद भुक्तान गरिरहेका थिए।

CIB का प्रहरी वरिष्ठ उपरीक्षक शिवकुमार श्रेष्ठका अनुसार लामालाई ललितपुर महानगरपालिका–३ धोबिघाटबाट र महर्जनलाई काठमाडौँ महानगरपालिका–१७ धोबिचौरबाट पक्राउ गरिएको हो।

लामा जगन्नाथदेवल महिला बन्दीगृहबाट फरार भएकी थिइन्। उनीलाई २२ वर्ष कैद सजाय तोकिएको थियो र २०७६ मंसिर १९ गते कारागार चलान गरिएको थियो।

त्यस्तै, महर्जनलाई एक वर्ष कैद सजाय र १ करोड ८ लाख ३९ हजार ७४७ रुपैयाँ ५० पैसा जरिवाना तोकिएको थियो। उनी गत चैतदेखि कैद भुक्तान गराइरहेका थिए।

दुवै फरार कैदीलाई पुनः कारागार कार्यालय जगन्नाथदेवलमा बुझाइएको प्रहरीले जनाएको छ।