वैदेशिक रोजगारीका लागि आकर्षक तलबको प्रलोभन देखाई विभिन्न देश पठाइदिन्छु भन्दै लाखौँ रुपैयाँ ठगी गरेको अभियोगमा प्रहरीले तीन जनालाई पक्राउ गरेको छ । काठमाडौँ उपत्यका अपराध अनुसन्धान कार्यालय टेकुको टोलीले उनीहरूलाई उपत्यकाका विभिन्न स्थानबाट पक्राउ गरेको हो ।

पक्राउ पर्नेहरूमा बाराका ४१ वर्षीय गगन बहादुर स्याङतान, सर्लाहीका २८ वर्षीय निर्जल बस्नेत र दाङका ३२ वर्षीय बल बहादुर चन्द ठकुरी रहेका छन् ।

प्रहरीका अनुसार गगन बहादुरले माल्दिभ्स पठाइदिने भन्दै ४ जनाबाट ४ लाख ३० हजार, निर्जलले मलेसिया पठाइदिने भन्दै १ जनाबाट ३ लाख ९० हजार र बल बहादुरले क्रोएसिया पठाइदिने भन्दै १ जनाबाट १ लाख रुपैयाँ ठगी गरी सम्पर्कविहीन भएका थिए ।

पीडितहरूको उजुरीका आधारमा बिहीबार र शुक्रबार पक्राउ परेका उनीहरूमध्ये स्याङतानलाई थप अनुसन्धानका लागि जिल्ला प्रहरी परिसर काठमाडौँ र अन्य दुई जनालाई वैदेशिक रोजगार विभाग ताहाचल पठाइएको प्रहरीले जनाएको छ ।