वैदेशिक रोजगारीका नाममा विभिन्न देश पठाइदिने बहानामा लाखौँ रुपैयाँ ठगी गरेको अभियोगमा प्रहरीले चार जनालाई पक्राउ गरेको छ।

पक्राउ पर्नेहरूमा सिन्धुली घर भई काठमाडौँको गोकर्णेश्वर-६ बस्ने ४६ वर्षीय गणेशबहादुर कार्की, दाङ घर भई नागार्जुन-४ बस्ने ४७ वर्षीय झगे विक, चितवन घर भई काठमाडौँ-१६ बस्ने ३४ वर्षीय कमल श्रेष्ठ र काठमाडौँ-७ बस्ने ६१ वर्षीया शारदा श्रेष्ठ रहेका छन्।

काठमाडौँ उपत्यका अपराध अनुसन्धान कार्यालय टेकुका अनुसार, पक्राउ परेकाहरूले आकर्षक तलबको प्रलोभन देखाएर पीडितहरूबाट ठूलो रकम असुल गरी सम्पर्कविहीन भएका थिए । पीडितहरूको उजुरीका आधारमा खटिएको प्रहरी टोलीले गणेशबहादुर र झगेलाई सोमबार तथा कमल र शारदालाई मंगलबार काठमाडौँका विभिन्न स्थानबाट नियन्त्रणमा लिएको हो।

पक्राउ परेका सबैलाई थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।