जम्मु–कश्मीरको पहलगाममा पर्यटकमाथि भएको आतंकी आक्रमणपछिको सुरक्षा तनावका बीच सशस्त्र प्रहरी बल, नेपाल (एपीएफ) ले भारतसँगको सीमा क्षेत्रमा उच्च सतर्कता अपनाउन विशेष सर्कुलर जारी गरेको छ ।

सशस्त्र प्रहरी प्रधान कार्यालयले सीमा क्षेत्रमा खटिएका सबै बाहिनीपतिहरूलाई विशेष निर्देशन पठाएको सशस्त्र प्रहरीका सह-प्रवक्ता तथा डीएसपी शैलेन्द्र थापाले पुष्टि गरेका छन् । उनका अनुसार पछिल्लो समय भारत–पाकिस्तानबीचको बढ्दो तनाव र सैन्य कारबाहीका घटनालाई ध्यानमा राख्दै नेपालले पनि सीमा सुरक्षामा कडाइ गरेको हो ।

“अनधिकृत घुसपैठ नियन्त्रण र निगरानीका लागि सर्कुलर जारी गरिएको हो,” उनले बताए । डीएसपी थापाका अनुसार सशस्त्र प्रहरी बलले भारतीय सशस्त्र सीमा बल (SSB) सँग सहकार्य गर्दै संयुक्त गस्ती र सूचना आदानप्रदानमा सक्रियता बढाएको छ । सीमा क्षेत्रमा २४ घण्टा निरन्तर गस्ती (पट्रोलिङ) हुने व्यवस्था मिलाइएको छ ।

“बीओपी (बॉर्डर आउट पोस्ट) बाट अर्को बीओपीसम्म सीमा क्षेत्रमा स्थायी गस्ती भइरहेकै छ,” उनले भने ।

त्यस्तै, सीमामा ओहोरदोहोर गर्ने व्यक्तिहरूको परिचयपत्र जाँच र अभिलेख राख्ने प्रक्रिया समेत कडाइका साथ लागू गरिएको छ । तर, परम्परागत रूपमा हुँदै आएको स्थानीय आवतजावतलाई अवरुद्ध नहुने गरी सजिलो बनाइएको सशस्त्र प्रहरी बलले स्पष्ट पारेको छ ।

शहरी क्षेत्रमा निगरानी बढाइयो
सशस्त्र प्रहरीका अनुसार सीमावर्ती क्षेत्र मात्र होइन, सम्भावित संवेदनशील शहरी क्षेत्रमा समेत निगरानी सघन बनाइएको छ । विशेषगरी भारत–पाकिस्तानबीचको पछिल्लो सैन्य तनाव र भारतद्वारा गरिएको ‘अपरेशन सिन्दूर’ नामक हवाई हमलापछि नेपालले पनि आफ्ना सीमा सुरक्षालाई थप सतर्क बनाएको हो ।