मधेश प्रदेश सभाको बैठक प्रतिपक्षी दलहरूको निरन्तर अवरोधका कारण अनिश्चितकालका लागि स्थगित भएको छ। अर्थमन्त्री सुनिल कुमार यादवको राजीनामा माग गर्दै प्रतिपक्षी दलहरूले आज पनि सदन अवरुद्ध गरेका हुन्।

नेकपा (एकीकृत समाजवादी) का सांसद कनिष पटेलले त्रुटिपूर्ण बजेट ल्याएको र बहुमतले पारित गरेको भन्दै अर्थमन्त्री यादवले राजीनामा दिनुपर्ने माग दोहोर्याए। उनले राजीनामा नआएसम्म सदन चल्न नदिने चेतावनी दिए।

त्यसपछि नेपाली कांग्रेसका प्रमुख सचेतक कुमारकान्त झाले प्रतिपक्षीलाई प्रतिवाद गर्दै सर्वदलीय बैठकमा सहभागी नहुने र सदन अवरोध गर्ने प्रवृत्तिमाथि आक्रोश पोखेका थिए।

लगातारको अवरोधपछि सभामुख रामचन्द्र मण्डलले बैठक अर्को सूचना नआएसम्म स्थगित गर्ने घोषणा गरे।

प्रतिपक्षी दलहरूले दुई दिनदेखि सभामुखले बोलाएको सर्वदलीय बैठक समेत बहिष्कार गर्दै आएका छन्। उनीहरूले आर्थिक वर्ष २०८२/८३ को बजेटमा त्रुटि रहेको, बिचौलिया हावी भएको र सभामुखले पनि तटस्थता नअपनाएको आरोप लगाएका छन्।

मधेश प्रदेश सभाको छैठौं अधिवेशनको पहिलो बैठक बिहीबार पनि अवरुद्ध भएको थियो। जसपा नेपाल, नेकपा माओवादी केन्द्र, नेकपा (एकीकृत समाजवादी), नेपाल संघीय समाजवादी पार्टी, राप्रपा नेपाल र नागरिक उन्मुक्ति पार्टीले सामूहिक रूपमा सदन अवरोध गर्ने रणनीति लिएका छन्।