वीरगन्ज – खानेपानीमन्त्री प्रदीप यादवलाई धम्की दिएको आरोपमा पक्राउ परेकी युवती किरण साहविरुद्ध जिल्ला अदालत वीरगन्जले तीन दिन पुर्पक्षमा राख्ने म्याद थप गरेको छ।

शनिबार पक्राउ परेकी किरणविरुद्ध विद्युतीय अपराधसम्बन्धी कसुर, संघीय सांसदलाई धम्की दिने कसुर, र झुटा अफवाह फैलाउने कसुरसम्बन्धी तीनवटा मुद्दामा म्याद थप गरिएको पर्सा प्रहरी नायब उपरीक्षक किशोर लम्सालले जानकारी दिए।

मन्त्री यादवको सचिवालयबाट शनिबार उजुरी आएपछि अनुसन्धानको लागि किरणलाई नियन्त्रणमा लिइएको थियो।

अडियो रेकर्ड अनुसार किरणले मन्त्री यादवसँग हैजाबारे प्रश्न गर्दै “हैजा लागेर मान्छे मरेको, तपाईं के गर्दै हुनुहुन्छ?” भन्ने गरी कुराकानी गरेकी थिइन्। सामाजिक सञ्जालमा सार्वजनिक उक्त अडियोमा किरणले पटक–पटक फोन गर्दा पनि मन्त्रीसँग सम्पर्क नहुँदा आक्रोश व्यक्त गरेको सुनिन्छ।