सुदूरपश्चिम रोयल्सले शनिबार लुम्बिनी लायन्सविरुद्ध ४५ रनको प्रभावशाली जित हात पार्दै आफ्नो विजयी लयलाई निरन्तरता दिएको छ।

सुदूरपश्चिमले टस हारेर ब्याटिङको मौका पाएपछि ओपनर सैफ जैबको उत्कृष्ट प्रदर्शनमा २० ओभरमा ४ विकेट गुमाएर १८७ रनको विशाल स्कोर खडा गर्यो। जैबले ६१ बलमा ९० रन बनाएर टीमलाई मजबुत अवस्थामा पुर्‍याए। कप्तान दीपेन्द्रसिंह ऐरीले ३९ रनमा अविजित रहँदै फिनिसिङमा महत्वपूर्ण योगदान दिएका थिए।

लक्ष्य पछ्याउने क्रममा लुम्बिनीले खेलको पहिलो बलमै अर्जुन साउदलाई गुमायो। त्यसपछि लुम्बिनीका अन्य मुख्य ब्याटरहरू पनि टिक्न सकेनन्। ५ ओभरभित्रै १९-५ को कमजोर स्थितिमा पुगेको लुम्बिनीका लागि विवेक यादवले ७७ रनको अविजित पारी खेल्दै केही सम्मानजनक स्कोर बनाउन मद्दत गरे।

बलिङतर्फ सुदूरपश्चिमका स्कट कुग्लेन र ब्रान्डन म्याकमुलेन चम्किए। कुग्लेनले २ विकेट लिए भने म्याकमुलेनले ३ विकेट लिएर विपक्षीलाई दबाबमा राखे।

यो जितसँगै सुदूरपश्चिमले लगातार तेस्रो खेल जित्दै अंक तालिकाको शीर्ष स्थान कब्जा गरेको छ। लुम्बिनी भने लगातार तेस्रो खेलमा पराजित हुँदै कमजोर प्रदर्शनले संघर्षरत देखिएको छ।

लुम्बिनी लायन्सका कप्तान रोहित पौडेलले बलिङमा रहेको कमजोरी स्वीकार्दै समाधान खोज्नुपर्ने बताएका छन्। एनपीएलको यो मोडमा सुदूरपश्चिमको प्रदर्शनले उपाधि दावेदारी बलियो देखिएको छ।