तनहुँका ५० जनाभन्दा बढी कांग्रेस कार्यकर्ताले पार्टी परित्याग गरी माओवादी केन्द्रमा प्रवेश गरेका छन्। ऋषिङ गाउँपालिका–१ झापुटारमा सोमबार र आँबुखैरेनी गाउँपालिकामा मंगलबार आयोजित माओवादी केन्द्रको पालिका अधिवेशन र खबरदारी सभामा उनीहरूले माओवादी प्रवेश गरेका हुन्।

नवप्रवेशीलाई माओवादी केन्द्रका उपमहासचिव एवं पूर्वअर्थमन्त्री वर्षमान पुन ‘अनन्त’ले टीका र माला लगाएर स्वागत गरेका थिए । झापुटारमा श्यामला थापासहित २७ जना र आँबुखैरेनीमा पदम नेपालीसहित २५ जना माओवादी केन्द्रमा प्रवेश गरेको जनाइएको छ।

कार्यक्रममा पुनले वर्तमान कांग्रेस–एमाले गठबन्धनको सरकार भ्रष्टाचार, राज्य दोहन र स्वार्थ समूहको संरक्षणमा लागेकाले जनताले नयाँ विकल्प खोजिरहेको बताए। उनले प्रचण्ड नेतृत्वको अघिल्लो सरकारले सुशासन, भ्रष्टाचार अन्त्य र मिटर ब्याजमा संलग्न व्यक्तिहरूविरुद्ध कडा कदम चालेको स्मरण गर्दै फेरि माओवादी केन्द्रप्रति जनताको विश्वास बढेको दाबी गरे।

पुनले वर्तमान सरकार गठनपछि हरेक साता भ्रष्टाचार र अनियमितताका घटना सार्वजनिक हुन थालेको आरोपसमेत लगाए। उनले माओवादी केन्द्रलाई भ्रष्टाचारमुक्त विकल्पका रूपमा स्थापित गर्न पुनः समर्थनको आह्वान गरेका थिए ।