नेकपा माओवादी केन्द्र निकट विद्यार्थी संगठन अखिल क्रान्तिकारीको २३ औं राष्ट्रिय सम्मेलन तोकिएको मितिमा हुनेमा अन्योल देखिएको छ। असोज २ देखि ५ सम्म प्रज्ञा भवन, कमलादीमा हुने भनिएको यो सम्मेलनको तयारी पूरा नहुँदा सम्भावित ढिलाइको अनुमान गरिएको हो।

विद्यार्थी संगठनका इन्चार्ज हिमाल शर्माले जिल्ला र प्रदेश सम्मेलन तालिका अनुसार भइरहेकोले सम्मेलन सर्ने सम्भावना नरहेको बताए। तर, केही जिल्लामा विवाद देखिएकाले आइतबार बस्ने कार्यालय बैठकले निर्णय गर्ने उनले स्पष्ट पारे। "केही जिल्लामा विवाद भए पनि निर्धारित समयमा सम्मेलन सम्पन्न गर्ने तयारीमा छौँ," शर्माले भने।

उपाध्यक्ष मदन भुलले राष्ट्रिय सम्मेलन तोकिएकै समयमा हुने दाबी गर्दै भने, "तयारी केही अधुरो छ, तर सम्मेलन स्थगित वा मिति सर्ने कुरा छैन।" उपाध्यक्ष पवन कार्कीले पनि तोकिएकै समयमा सम्मेलन हुने दाबी गरे। "बाहिर भ्रम भए पनि सम्मेलन सर्दैन," उनले थपे।

हालसम्म ७० वटा जिल्लामा सम्मेलन सम्पन्न भएको र प्रदेशतर्फ कोशी र गण्डकीमा सम्मेलन समाप्त भइसकेको जानकारी उपाध्यक्ष कार्कीले दिए। लुम्बिनी प्रदेशको बन्दसत्र सुरु भइसकेको छ भने देशभरिका जिल्लाहरूमा ७० प्रतिशत सम्मेलन सम्पन्न भएको छ।

अखिल क्रान्तिकारीले आफ्नो विधान संशोधन गरी ३३ पदाधिकारी सहित २४३ सदस्यीय केन्द्रीय समिति बनाउने प्रस्ताव गरेको छ। सम्मेलनमा प्रस्तावित विधान पारित भएमा नयाँ नेतृत्वको निर्वाचन हुनेछ।

वर्तमान अध्यक्ष पञ्चा सिंह आफ्नो कार्यकाल पूरा गरी यसै सम्मेलनबाट बिदा हुँदै छिन्, भने नयाँ नेतृत्वका लागि उपाध्यक्ष र महासचिव पदका आकांक्षीहरू प्रतिस्पर्धामा छन्।

#अखिल_क्रान्तिकारी