ब्राजिलका राष्ट्रपति लुइज इनासियो लुला दा सिल्भाले पूर्व अमेरिकी राष्ट्रपति डोनाल्ड ट्रम्पलाई 'विश्वको सम्राट बन्न चाहेको' आरोप लगाएका छन् । बिहीबार एक स्थानीय रेडियोसँगको अन्तर्वार्तामा लुलाले ट्रम्पले अन्य देशहरूको सार्वभौमसत्तामा हस्तक्षेप गरिरहेको बताएका हुन् ।

"दोस्रो विश्वयुद्धपछि पछिल्ला ७० वर्षमा लोकतन्त्र सबैभन्दा राम्रो शासनको उदाहरण बनेको छ," लुलाले भने, "तर ट्रम्पज्यूले काम गर्ने शैली हेर्दा उनी विश्वको सम्राट बन्ने प्रयास गरिरहेका छन् । उनी हरेक देश र सार्वजनिक नीतिमा हस्तक्षेप गर्न चाहन्छन् ।"

लुलाको टिप्पणी ट्रम्पले युक्रेनका राष्ट्रपति भोलोदिमिर जेलेन्स्कीलाई ‘तानाशाह’ भनेपछि र रूस-युक्रेन युद्धको दोष जेलेन्स्कीमाथि थोपरेपछि आएको हो। यसबीच, वासिङ्टनले युद्ध अन्त्य प्रयासमा रुससँग प्रत्यक्ष वार्ता थालेको भन्दै किएभ असन्तुष्ट देखिएको छ।

लुलाले ट्रम्पसँग जनवरीदेखि कुनै कुराकानी नगरेको भए पनि अमेरिकालाई ब्राजिलको महत्त्वपूर्ण व्यापारिक साझेदारको रूपमा दोहोर्याउँदै ‘मित्रता’ प्रगाढ बनाउन आग्रह गरे। "हामी संरक्षणवाद रोक्न चाहन्छौँ," लुलाले स्टिल जस्ता ब्राजिलियन उत्पादनहरूमा वासिङ्टनले लगाएको करको आलोचना गर्दै भने।