प्रधानमन्त्री केपी शर्मा ओली पाँच दिने औपचारिक भ्रमणका लागि आज बिहान चीन प्रस्थान गरेका छन्।

ओली त्रिभुवन अन्तर्राष्ट्रिय विमानस्थलबाट हिमालय एयरलाइन्समार्फत चीनतर्फ प्रस्थान गरेका हुन्। विमान भारत, बंगलादेश र म्यानमारको आकाशमार्ग हुँदै चीन पुग्नेछ। चिनियाँ राष्ट्रपति सी चिनफिङको निमन्त्रणमा भएको यस भ्रमणअन्तर्गत उनले सांघाई सहयोग संगठन (एससीओ) शिखर सम्मेलनमा सहभागी हुनेछन्।

प्रधानमन्त्रीसँगै धर्मपत्नी राधिका शाक्य, शिक्षामन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, नेपाली कांग्रेस उपसभापति पूर्णबहादुर खड्का, प्रधानमन्त्रीका आर्थिक सल्लाहकार डा. युवराज खतिवडा, सांसद छविलाल विश्वकर्मासहितका उच्च अधिकारी पनि भ्रमण टोलीमा रहेका छन्।

एससीओ शिखर सम्मेलन भदौ १५ र १६ गते (सेप्टेम्बर १–२) उत्तरी चीनको तियान्जिनमा आयोजना हुँदैछ। सम्मेलनको उद्घाटन राष्ट्रपति सीले गर्नेछन् भने भारतीय प्रधानमन्त्री नरेन्द्र मोदीसहित विभिन्न मुलुकका राष्ट्र तथा सरकार प्रमुखहरूको उपस्थिति रहनेछ।

भ्रमणका क्रममा प्रधानमन्त्री ओलीले राष्ट्रपति सीसँग द्विपक्षीय भेटवार्ता गर्नेछन्। त्यस्तै, उनले भदौ १७ गते (सेप्टेम्बर २) तियान्जिनमा हुने ‘एससीओ प्लस’ शिखर सम्मेलनलाई सम्बोधन गर्ने कार्यक्रम छ। यस क्रममा उनले चीनका उपराष्ट्रपति हान झेङलगायत अन्य मुलुकका नेताहरूसँग समेत भेटवार्ता गर्नेछन्।

प्रधानमन्त्री ओली चीनमा आयोजित जापानी आक्रमणविरुद्ध चीनको प्रतिरोध युद्ध तथा विश्वव्यापी फासिवादविरोधी युद्धमा विजय प्राप्तिको ८० औं वार्षिकोत्सव कार्यक्रममा समेत सहभागी हुने तय भएको छ।

प्रधानमन्त्री भएपछिको यो ओलीको दोस्रो चीन भ्रमण हो। उनी भदौ १८ गते (सेप्टेम्बर ३) बुधबार स्वदेश फर्कनेछन्। त्यसपछि ओली भदौ ३१ गते (सेप्टेम्बर १६) दुई दिने भारत भ्रमणमा प्रस्थान गर्ने कार्यक्रम छ।