नेकपा (एकीकृत समाजवादी) का सम्मानित नेता झलनाथ खनाल र महासचिव घनश्याम भूसाल निकट नेताहरूको बानेश्वरमा भएको भेलाले नेकपा (माओवादी केन्द्र) सँग भइरहेको पार्टी एकताबारे असन्तोष प्रकट गरेका छन्।

भेलाले ‘माओवादीसँग मात्र एकता पर्याप्त नहुने’ भन्दै नेतृत्वमा पुस्तान्तरणसहित बृहत वाम एकताको पहल गर्नुपर्ने निष्कर्ष निकालेको सहभागी नेताहरूले जानकारी दिएका छन्।

जिवनराम श्रेष्ठको अगुवाइमा भएको भेलामा रामकुमारी झाँक्री, विजय पौडेल, हरि पराजुलीलगायत नेताहरू सहभागी थिए । भेलामा सहभागीहरूले अध्यक्ष माधवकुमार नेपालको ‘एकल चासोमा चलिरहेको माओवादीसँगको वार्ता’ प्रति आपत्ति जनाएका छन् ।

सहभागि एक नेताले भने, “पार्टी एकताको नाममा शीर्ष नेताहरू बसेर सातै प्रदेशमा छलफल भए पनि त्यसको खास औचित्य छैन भन्ने निष्कर्ष आजको भेलाले निकालेको हो।”

करीब महिना दिनअघि माओवादी अध्यक्ष पुष्पकमल दाहाल ‘प्रचण्ड’ र समाजवादी अध्यक्ष माधवकुमार नेपालसहितका नेताहरूले सात प्रदेशका अध्यक्ष, इन्चार्ज र संसदीय दलका नेताहरूसँग छुट्टाछुट्टै छलफल गरेका थिए । तर, ती छलफलमध्ये कोशी प्रदेशमा मात्रै दुवै दलका नेताहरू एकताका पक्षमा उभिएका थिए, अन्य प्रदेशमा भने गहिरो मतभेद देखिएको सहभागीहरूको भनाइ छ ।

भेलाले माओवादीसँग मात्र हुने एकता अस्वीकार्य भएको बताउँदै बृहत वाम एकताको प्रयासलाई निरन्तरता दिनुपर्ने र त्यसैमार्फत पार्टी निर्माणमा लाग्नुपर्ने निष्कर्ष निकालेको छ ।

सहभागी नेताहरूले अध्यक्ष नेपालप्रति पनि तीव्र आलोचना गरेका थिए । उनीहरूले नेपालले अध्यक्ष पद छोडेर आफ्नो राजनीतिक कद बढाउनुपर्नेमा जोड दिएका छन् । “पद नछोड्न भनेर उहाँलाई उक्साउने सीमित व्यक्तिहरूकै कारण उहाँको कद उल्टै घटिरहेको छ,” एक नेताले टिप्पणी गरे ।

अध्यक्ष नेपाल पतञ्जली जग्गा प्रकरणमा अख्तियारले दायर गरेको भ्रष्टाचार मुद्दामा संलग्न रहेका कारण हाल सांसद पद निलम्बनमा छन् । उनलाई पार्टी अध्यक्ष पद छोड्नुपर्ने माग झलनाथ खनालले अघिल्लो बैठकमै औपचारिक रूपमा राखिसकेका थिए ।

पछिल्ला दिनमा खनाल र नेपालबीच आपसी आलोचना सार्वजनिक रूपमा भइरहे पनि केही समयअघि मात्र दुबै नेताले ‘एकअर्काविरुद्ध बाहिर नबोल्ने’ सहमति गरेका थिए।

बानेश्वर भेलामा झलनाथ खनाल र घनश्याम भूसाल स्वयं सहभागी भने थिएनन् ।