नेकपा एमालेको ११औँ महाधिवेशनका लागि पार्टी महासचिव शंकर पोखरेलको गृहजिल्ला दाङमा प्रतिनिधि छनोट प्रक्रियामा विवाद उत्पन्न भएको छ। जिल्ला सचिव सूर्यबहादुर डाँगीका अनुसार दाङबाट सर्वसम्मत रूपमा २३ जना प्रतिनिधि चयन गरिएका छन् । उनका अनुसार खुलातर्फ १०, महिलातर्फ ७, युवातर्फ ३ र दलिततर्फ ३ जना गरी कुल २३ जना प्रतिनिधि सर्वसम्मत चयन भएका हुन्।

तर, अर्को पक्षले भने प्रतिनिधि एकलौटी ढंगले चयन गरिएको आरोप लगाउँदै आपत्ति जनाएको छ। लुम्बिनी प्रदेश कमिटी सदस्य कृष्णप्रसाद भुसालले विधि र प्रक्रियाविपरीत एकलौटी रूपमा प्रतिनिधि छानिएको आरोपसहित पार्टीको केन्द्रीय संगठन विभागमा उजुरी दिएका छन्। उनका अनुसार संगठन विभागले जारी गरेको सर्कुलरअनुसार मतदाता नामावली र निर्वाचन कार्यतालिका सार्वजनिक नगरी साढे १० हजार सदस्यको हक अधिकार कुण्ठित गर्दै प्रतिनिधि चयन गरिएको छ।

यद्यपि निर्वाचन समितिले आज बिहान २३ जना प्रतिनिधि सर्वसम्मत चयन भएको दाबी गर्दै नामावली प्रकाशित गरेको थियो । यस्तै प्रतिनिधिका आकांक्षी सुरेश गौतमले स्वेच्छाचारी निर्णय गर्दै प्रतिनिधि छनोट प्रक्रिया अघि बढाइएको आरोप लगाउँदै उक्त सम्पूर्ण प्रक्रिया तत्काल खारेज गर्न विज्ञप्तिमार्फत माग गरेका छन्।

“जिल्लाका नेतृत्वहरू प्रतिनिधि छनोटको यो विधिहीन र मनपरी निर्णय महासचिव शंकर पोखरेलको निर्देशनमा गरिएको बताइरहेका छन्। यदि यो सत्य हो भने पार्टीको केन्द्रीय नेतृत्वबाटै विधानको उल्लंघन भएको ठहरिनेछ, जुन अत्यन्त दुःखद र निन्दनीय छ। कुनै पनि नेताको निर्देशनले पार्टी विधान मिच्न सक्दैन,” गौतमले विज्ञप्तिमा उल्लेख गरेका छन्।

हेर्नुहोस विज्ञप्ति -