नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ ले जनता संगठित र सचेत नभए देश फेरि संकटतर्फ धकेलिन सक्ने चेतावनी दिएका छन्। आज पोखरामा आयोजित ‘एकता सन्देश सभा’ लाई सम्बोधन गर्दै उनले मुलुक गम्भीर राष्ट्रिय संकटको मोडमा रहेको बताएका छन् ।

उनका अनुसार जनता जागरूक बन्ने, राष्ट्रियताको भावना बलियो बनाउने र संगठनात्मक रूपमा एकजुट हुने हो भने मात्र देशले संभावित संकट टार्न सक्छ। ‘यदि जनता जागरूक भएनन्, राष्ट्रियताको भावना बलियो बनाएनन् भने देशमा फेरि ठूलो संकट आउन सक्छ,’ प्रचण्डले भने।

उनले राष्ट्रको स्वाधीनता र सुरक्षा कमजोर बन्दै गएको दाबी गर्दै देशभक्त, वामपन्थी र कम्युनिस्ट शक्तिहरूलाई राष्ट्रिय एजेन्डामा एकजुट हुन अपिल गरेका छन् ।

संयोजक प्रचण्डले एमाले र कांग्रेस नेतृत्वको दुई तिहाइ शक्तिले जनताका लागि ठोस उपलब्धि दिन नसकेको आरोप पनि लगाएका छन् । ‘कांग्रेस–एमालेका कारण राष्ट्र संकटमा परेको हो,’ उनले भने, ‘सरकारमा हुँदा भ्रष्टाचारविरुद्ध लड्न खोज्यौँ, तर रोकियो। स्वाधीनता र राष्ट्रियताको पक्षमा लड्न हामीलाई शक्ति दिइएन।’

उनका अनुसार सुरु गरिएको ‘एकता अभियान’ चुनाव जित्ने उद्देश्यका लागि मात्र नभई राष्ट्र रक्षा, स्वाधीनताको संरक्षण र दीर्घकालीन समृद्धिको आधार निर्माण गर्ने लक्ष्यसहित अघि बढाइएको हो। ‘चुनाव त जित्छौँ,’ प्रचण्डले भने, ‘तर राष्ट्र बचाउन जनताको राष्ट्रिय एकता अनिवार्य छ।’