नेकपा (माओवादी केन्द्र)को सहायक संगठन वाइसियल नेपालअन्तर्गत विशेष प्रदेशको सुदूरपश्चिम विशेष जिल्लाको भेलाबाट आदित्य दाहाल अध्यक्षमा निर्वाचित भएका छन् ।

हिजो किर्तिपुरमा सम्पन्न भेलाले अध्यक्षमा दाहाल, उपाध्यक्षमा रमेश भट्ट, सचिवमा विमल ओली, कोषाध्यक्षमा सागर गुरुङसहित ३७ सदस्यीय जिल्ला समिति गठन गरेको हो ।

भेलामा वाइसियल नेपालका केन्द्रीय उपाध्यक्ष मञ्जु बम सावित्रा प्रमुख अतिथि, महासचिव गणेश साही विशिष्ट अतिथि तथा सचिव नवराज ऐरको विशेष उपस्थिति रहेको थियो ।

कार्यक्रममा सहभागी युवा नेताहरूले वर्तमान राजनीतिक परिस्थिति, माओवादी केन्द्रप्रति जनताको विश्वास, र युवाको भूमिकाबारे धारणा राख्दै प्रशिक्षण मूलक मन्तव्य दिएका थिए ।

नेता नवराज ऐरले भने, “युवाहरूको पार्टी भनेकै माओवादी केन्द्र हो । संगठनले आगामी सम्मेलनबाट विशेष टिम तयार गरी पार्टी राजनीतिमा नयाँ गति ल्याउने छ । ८४ को चुनावमा माओवादी केन्द्रलाई पहिलो बनाउने अभियानमा वाइसियल नेपालले अग्रणी भूमिका खेल्नुपर्नेछ ।”