राजतन्त्रको तुलनामा गणतन्त्रमा धनी–गरिबबीचको खाडल उल्लेख्य रूपमा घटेको एमाले महासचिवको दाबी
नेकपा कम्युनिष्ट पार्टी (एमाले)ले महासचिव शङ्कर पोखरेलले गणतन्त्रमा मध्यमवर्गको उदय भइरहेको बताएका छन् ।
एमालेले आज आयोजना गरेको ‘गणतन्त्र उत्सव’पछि आयोजित कोणसभालाई सम्बोधन गर्दै उनले लोकतन्त्रले जनतालाई शक्तिशाली बनाउँछ भन्ने मान्यतालाई स्थापित गरेको टिप्पणी गरेका थिए । उनले नेपालले बहुजातीय, बहुभाषिक, बहुसांस्कृतिक विशेषतासहित समावेशी लोकतान्त्रिक गणतन्त्र व्यवस्था स्थापना गरेको भन्दै त्यही व्यवस्थाबाट नेपाली जनतालाई विकास र समृद्धिको यात्रामा अगाडि बढाइरहेको उल्लेख गरे ।
उनले गणतन्त्र व्यवस्थाप्रति नेपाली जनताको अपनत्व रहेको उल्लेख गर्दै जनताको बलिदानीपूर्ण सङ्घर्ष प्राप्त भएको गणतन्त्र जनताको सार्वभौमसत्ताको प्रतीकका रुपमा रहेको बताए ।
महासचिव पोखरेलले कतिपय मानिसले लोकतन्त्र र गणतन्त्रले के दियो भनेर प्रश्न गरिरहेको भन्दै पञ्चायतका अन्तिम समयमा धनी र गरिबबीचको खाडल २१ गुणा थियो तर आज आज त्यो खाडल घटेर छ गुणामा सीमित भएको बताए । उनले सिङ्गो राष्ट्रको ध्यान बजेटमा केन्द्रित भइरहेका बेला जनताको विजयको उत्सवको दिनलाई पछाडि फर्काउने अवाञ्छित गतिविधि भइरहेको उल्लेख गरेका छन् ।
एमाले आज सबै पालिकामा गणतन्त्र दिवस मनाएको छ । एमाले प्रचार विभाग प्रमुख उत्सव विभिन्न जातजातिका बाजागाजासहित भव्य रुपमा मनाएको बताए । सभा अघि एमालेले वेषभूषा, सांस्कृतिक झाँकी र्याली निकालेको थियो ।
एमालेले आरआर क्याम्पस, पद्यमकन्या क्याम्पस, बागबजार अगाडिबाट, अनामनगरसहित विभिन्न स्थानबाट विभिन्न वेषभूषा, सांस्कृतिक झाँँकी र्यालीसहित प्रदर्शनीमार्गस्थित भृकुटीमण्डपमा भेला भएर बृहत् र्याली निस्केको थियो । र्याली सहिदगेट, सुन्धारा रत्नपार्क हुँदै पुन भृकुटीमण्डपमा पुगी समापन गरिएको थियो ।
तपाईको प्रतिक्रिया दिनुहोस