प्रधानमन्त्री केपी शर्मा ओलीले घुस प्रकरणमा मुछिएका संघीय मामिला तथा सामान्य प्रशासन मन्त्री राजकुमार गुप्तालाई राजीनामा दिन निर्देशन दिएका छन् ।

सोमबार बिहान प्रधानमन्त्री निवास बालुवाटारमा बोलाएर प्रधानमन्त्री ओलीले मन्त्री गुप्तासँग राजीनामाको आग्रह गरेका हुन्। झापाबाट फर्केपछि ओलीले मन्त्री गुप्तालाई बिहानै भेटी निर्देशन दिएका थिए ।

करिब छ महिनाअघि (पुस महिनामा) भएको भनिएको घुस प्रकरणको अडियो केही दिनअघि मात्रै सार्वजनिक भएको थियो। सार्वजनिक अडियोमा घुसको लेनदेनसम्बन्धी संवाद रहेको र त्यससँग सम्बन्धित नोट तथा नम्बरसहितको डायरी अख्तियार दुरुपयोग अनुसन्धान आयोगमा बुझाइएको बताइएको छ ।

अडियो सार्वजनिक भएपछि गुप्ताको घुस प्रकरण संघीय संसद् हुँदै राष्ट्रिय बहसको विषय बनेको छ। प्रधानमन्त्री ओलीले यस विषयलाई गम्भीर रुपमा लिँदै मन्त्रीमाथि कारबाही प्रक्रिया अघि बढाउने तयारी गरेका छन् ।