नेपाल विद्युत प्राधिकरणले पूर्वी नेपालका विभिन्न जिल्लामा शनिबार १२ घण्टासम्म विद्युत सेवा अवरुद्ध हुने जनाएको छ।

प्राधिकरणका अनुसार शनिबार बिहान ४:०० बजे देखि दिउँसो ४:०० बजेसम्म विद्युत् आपूर्ति पूर्ण रूपमा बन्द हुनेछ। यसबाट झापा, इलाम, पाँचथर र ताप्लेजुङ जिल्लाका सम्पूर्ण क्षेत्र तथा मोरङको उर्लाबारी, पथरी र आसपासका क्षेत्रहरू प्रभावित हुनेछन्।

लाइन काटिनुको कारण
मोरङस्थित केरौन १३२/३३ केभी सबस्टेसनका उपकरणहरूको परीक्षण तथा सञ्चालन (टेस्टिङ एन्ड कमिसनिङ) कार्य गर्नुपर्ने भएकाले यो अवरोध सिर्जना भएको हो। साथै, दुहबी–दमक १३२ केभी प्रसारणलाइनअन्तर्गत केरौनस्थित टावर नं. ६८ र ६९ बीच डेड एन्ड टावर जडान गर्ने कार्यसमेत गरिने भएकाले सो अवधिभर अस्थायी रूपमा विद्युत् आपूर्ति बन्द गर्नुपरेको प्राधिकरणले स्पष्ट पारेको छ।