भारतले पाकिस्तानमाथि सुरु गरेको पछिल्लो सैन्य कारबाहीलाई ‘अपरेसन सिन्दूर’ नाम दिएको छ । यो नामले केवल सैन्य रणनीति मात्र होइन, सांस्कृतिक र भावनात्मक सन्देश पनि बोकेको देखिन्छ ।

सैन्य कारबाहीहरूमा नामकरण एउटा मनोवैज्ञानिक र प्रतीकात्मक अभ्यास हो । यस्तो नामले सैनिकहरूलाई उद्देश्यप्रति प्रेरित गर्नुका साथै जनतालाई भावनात्मक रूपमा जोड्ने काम गर्छ । भारतले यसपटकको कारबाहीको नाम ‘सिन्दूर’ राख्नुको पछाडि पनि त्यस्तै मनोविज्ञान छ ।

२२ अप्रिलमा भारतीय क्षेत्र पहलगाममा भएको आतंकवादी आक्रमणमा एक जना नेपालीसहित २६ जनाको ज्यान गएको थियो । भारतीय सञ्चारमाध्यमहरूका अनुसार उक्त आक्रमणमा मारेिएका पुरुषहरूका श्रीमतीहरूको सिन्दूर पुछिएको प्रतीकको रूपमा भारतले उक्त कारबाहीको नाम ‘अपरेसन सिन्दूर’ राखेको हो । हिन्दू परम्परामा सिन्दूर विवाहको प्रतीक हो र श्रीमानको मृत्यु भएपछि महिलाले सिन्दूर लगाउन छाड्ने चलन छ ।

यसरी, आतंकवादी आक्रमणमा श्रीमान गुमाएका महिलाहरूको पीडालाई बलियो भावनात्मक प्रतीक बनाउँदै भारतले कारबाहीको नाम 'सिन्दूर' राखेको बताइएको छ । यस नाममार्फत् भारतले एक किसिमको सांस्कृतिक न्यायको सन्देश दिन खोजेको छ ।

यद्यपि यो नाम भारतीय सरकारले औपचारिक रूपमा पुष्टि गरेको छैन । तर एबीपी न्यूज र अलजजिराजस्ता अन्तर्राष्ट्रिय सञ्चारमाध्यमहरूले नामकरणलाई पहलगामको त्रासदीसँग जोडेर व्याख्या गरेका छन् ।