भारतले बुधबार बिहान पाकिस्तानमाथि गरेको सैन्य आक्रमणमा अतिवादी संगठन जैश–ए–मोहम्मद का संस्थापक मसूद अजहरका आफन्त र सहयोगीहरू गरी १४ जना मारिएको दाबी गरिएको छ।

जैश–ए–मोहम्मदको तर्फबाट जारी विज्ञप्तिअनुसार मारिएकामध्ये अजहरकी दिदी, भिनाजु, भतिजा, उनका पत्नी, एक भतिजी र पाँच जना बच्चा छन् । साथै, उनका तीनजना सहयोगी र एक सहयोगीकी आमा पनि हमलामा मारिएको जनाइएको छ ।

भारतीय सेनाले ‘अपरेसन सिन्दुर’ नाम दिइएको कारबाही अन्तर्गत पाकिस्तान र पाकिस्तान–नियन्त्रित कश्मीरमा रहेका नौवटा आतंकवादी शिविरहरूमा मिसाइल हमला गरेको जनाएको छ । भारतीय पक्षको दाबीअनुसार ती शिविरहरूमा जैश–ए–मोहम्मद, लश्कर–ए–तैयबा र हिज्बुल मुजाहिद्दिनका लडाकूलाई प्रशिक्षण दिइँदै आएको थियो। मसूद अजहरको जन्मस्थल पाकिस्तानको बहावलपुरस्थित सुभान अल्लाह मस्जिद नजिकै भएको हमलामा उनको परिवारका सदस्य मारिएको बताइएको छ । अजहर हाल पनि कडा सुरक्षाबीच बहावलपुरमै बसिरहेको आशंका गरिएको छ ।

मसूद अजहर सन् १९९९ मा काठमाडौंबाट दिल्ली जाँदै गरेको इन्डियन एयरलाइन्सको 'आइसी–८१४' विमान अपहरण प्रकरणपछि चर्चामा आएका थिए । सो विमानमा चालक दलसहित १८८ जना सवार थिए, जसमा आठ जना नेपाली यात्रु पनि थिए । एक यात्रुको हत्या गरिएको थियो । उक्त घटनापछि भारतले फिरौतीस्वरूप जेलमा रहेका तीन आतंकवादीलाई रिहा गरेको थियो, जसमा मसूद अजहर पनि एक थिए । जेलमुक्त भएपछि अजहरले सन् २००० मा जैश–ए–मोहम्मदको स्थापना गरेका थिए ।

यस समूहमाथि सन् २००१ मा भारतीय संसदमाथि आक्रमण, २०१६ को पठानकोट हमला र २०१९ को पुलवामा बम विष्फोटमा संलग्न रहेको आरोप छ। पुलवामा हमलामा ४० जना भारतीय सुरक्षाकर्मीको ज्यान गएको थियो ।