रसुवास्थित भोटेकोशी र त्रिशूली नदीमा आएको भीषण बाढीका कारण निर्माणाधीन जलविद्युत् आयोजनाका सुरुङमा फसेका १९१ जनाको सकुशल उद्धार गरिएको छ। सुरुङभित्र अलपत्र परेका इन्जिनियर, प्राविधिक र मजदुरहरूलाई नेपाली सेनाको टोलीले हेलिकप्टरतर्फमार्फत सुरक्षित स्थानमा सारेको हो।
सैनिक जनसम्पर्क तथा सूचना निर्देशनालयका अनुसार शुक्रबार बिहानदेखि अपराह्नसम्म टिमुरे, स्याफ्रुबेसी र मैलुङलगायतका क्षेत्रबाट ५६ जना परराष्ट्र नागरिक (विदेशी) सहित करिब ९०० जनाको उद्धार गरिएको छ।
विस्तृत उद्धार तथा स्वास्थ्य सेवा विवरण:
कुल उद्धार संख्या: भदौ १० गतेदेखि हालसम्म स्थल र हवाई मार्गबाट कुल २ हजार १०१ जनाको उद्धार भइसकेको छ।
राहत ढुवानी: काठमाडौँबाट त्रिशूलीसम्म स्थलमार्ग र हेलिकप्टरमार्फत राहत सामग्री निरन्तर ढुवानी गरिएको छ।
स्वास्थ्य सेवा: सेनाद्वारा सञ्चालित आपत्कालीन उपचार केन्द्रहरूमा त्रिशूलीमा ४५६ र धुन्चेमा १०५ गरी आज मात्रै ५६१ जनाले स्वास्थ्य सेवा प्राप्त गरेका छन्। हालसम्म यी केन्द्रबाट १ हजार ७०६ जनाले उपचार पाएका छन्।
सुरक्षाकर्मीको परिचालन: प्रभावित जिल्लाहरूमा ६ हजार ७०० भन्दा बढी सुरक्षा फौज खटिएर खोज, उद्धार, उपचार र राहत वितरण कार्यलाई तीव्रता दिइरहेका छन्।
शनिबार नदी किनारामा शव खोजी तथा व्यवस्थापन, आपत्कालीन स्वास्थ्य शिविरको निरन्तरताका साथै मैलुङ, टिमुरे र स्याफ्रुबेसी क्षेत्रमा खोज तथा उद्धार कार्य जारी राखिनेछ। विशेषगरी सुरुङहरूमा सम्पर्कविहीन रहेका व्यक्तिको खोजी र बाढीले अवरुद्ध पारेका सडक सञ्चालनमा ल्याउन सैन्य शक्ति पूर्ण रूपमा परिचालन गरिने सेनाले जनाएको छ।
तपाईको प्रतिक्रिया दिनुहोस