सरकारले इम्बोस्ड नम्बर प्लेट अनिवार्य गरेसँगै हाल देशभरका ९ वटा कार्यालयमार्फत यसको जडान कार्य भइरहेको यातायात व्यवस्था विभागले जनाएको छ।

विभागका अनुसार बागमती प्रदेशमा ललितपुरको एकान्तकुना, मकवानपुरको हेटौंडा, काठमाडौंको गुर्जुधारा र टेकुको सवारी परीक्षण कार्यालयमा इम्बोस्ड नम्बर प्लेट जडान भैरहेको छ। गण्डकी प्रदेशमा पोखराको कास्की कार्यालयबाट, लुम्बिनी प्रदेशमा बुटवल, तुल्सीपुर र नेपालगञ्ज कार्यालयबाट तथा कर्णाली प्रदेशमा सुर्खेत कार्यालयमार्फत जडान सुरु भएको छ।

विभागले १ असोजदेखि थप ७ कार्यालयमार्फत इम्बोस्ड नम्बर प्लेट जडान सुरु हुने जनाएको छ। यसअनुसार सुदूरपश्चिम प्रदेशमा धनगढी र कञ्चनपुर, मधेश प्रदेशमा सिरहाको लहान, बागमतीमा चितवन, कोशीमा इटहरी (सुनसरी) र बिर्तामोड (झापा) बाट पनि जडान थालिनेछ।

संघ र प्रदेशका मन्त्रीस्तरीय विषयगत समिति बैठकले १ असोजदेखि सवारीसाधन दर्ता, नामसारी वा नवीकरण गर्दा इम्बोस्ड नम्बर प्लेट अनिवार्य गर्ने निर्णय गरेको छ। विभागले सवारीधनीलाई आफूलाई पायक पर्ने कार्यालयमा गई तत्काल नम्बर प्लेट जडान गर्न आग्रह गरेको छ।

विभागका अनुसार निकट भविष्यमा सबै सवारीसाधनमा इम्बोस्ड नम्बर प्लेट जडान भएसँगै सवारीसाधनको विवरण डिजिटाइज हुनेछ। यसका लागि सरकारले देशका मुख्य प्रवेशद्वार वा प्रवेश बिन्दुमा १० स्थानमा आरएफआईडी गेट निर्माण गर्ने तयारी गरेको छ। तीमध्ये काठमाडौंका २ स्थानमा गेट निर्माण सम्पन्न भई सञ्चालनमा आइसकेको विभागले जनाएको छ।